حماة نبيهه مدام فريال قاعده حاطة رجل على رجل
ومش عاجبها الحال
الست فكيهه بتكلم الست ام مصطفى
هيه مالها نافشه ريشها كده ليه زي ديك البراري
الست ام مصطفى: انا عارفة يختي ! ولا اللي جمبها دي مالها متنشيه كده؟
الست فكيهه: يمكن مش عاجبينهم؟
الست سعدية تضايف اهل العريس
يا الف مرحب .. انستىونا وشرفتونا يا فريال يا ختي
:امووووه....
ترد مدام فريال بالاطة: ميرسي..
تروح شاده اخت مدام فريال:وتاخدها بالحضن
: يا اهلا يا ست قوفلدان هانم
مدام جولفدان بقرف: اهلا
الست سعدية: ومين الامورة اللي جمبك دي؟
مدام فريال: دي ميتهتاب بنتي
الست سعديه: يختي عليها قمر يا اخواتي..
مهيتاب: اهلا تانت
الست سعديه: اهلا يا روح تانت .. امال فين بقيت اخواتك
مهيتاب: سوري يا تانت مش حيقدرو يجيجوا .. اصل البيت صغير
الست سعديه: الوسع في القلوب.. وان ما شالتهمش الارض نشيلهم جوا حبابي عنينا
زغرطوا يا بنات
لولولوولولوي...
فكيهه: حسرة عليكي يافكيهه مش لو كان عندك بت كان زمانها في ..عروسة زي نبيهه
صفية: ما احنا بناتك برضه يا خاله فكيهه
فكيهه: ايوه يا صفية يا بنتي وندرا عليا ليلة فرحك لا اتحزم وارقص
الست ام مصطفى: مش لما يجي العريس الاول
الست سعديه:حيجي ان شاء الله.. ونفرح بيها زي نبيهه
الست ام مصطفى: امييين يارب
صفيه: يا رب يا ااامه
الست ام مصفى: اختشي يا بت
صفية: هو انا عملت ايه يا امه؟
الست سعديه: قومي ارقصي يا فكيهه .. ولا صفية بس اللي زي بنتك.. ونبيهه خلاص ما بقتش بنتك وحبيبتك
الست فكيهه: اصل يا اختي ... حمات بنتك واللي معاها ناس طالعين فيها .. لا يقولوا علينا ناس بلدي
الست سعديه: بلدي .. بلدي.. هما يعني لسه حيعرفونا
قومي يا فكيهه قومي
وتقوم الست فكيهه ترقص والبنات تغني..
وترقص الست سعديه والست ام مصطفى
مهيتاب: ماما ايه الناس البيئة دي؟
وائل اخويا حيجوز من الناس دي يعععع
فريال: بس بعدين يسمعوكي ...
مهيتاب: بس دول بلدي قوي ياماما.
فريال: قلت لك وطي صوتك..انت مش عارفه اللي مش عاجبينك دول باباهم عنده اطيان وعمرات ..كتيير
ميهتاب: دول ؟ امال ليه مش عايشين في فيلا؟
فريال: اصل ده بيت العيله .. وهما بيحبوه ...
جولفدان: ايه يا فريال هو احنا حنفضل قاعدين كتيير
فريال: اه فعلا كفاية كده انا حتخنق.. يلا بينا
فريال وجولفدان يقوموا
الست سعديه تشوفهم
ايه يا ست فريال هانم.. مالسه بدري
ما تخليكوا شويه يا ست قفطان ..
جولفدان: قفطان؟؟ انا قفطان
انا حستناكي تحت يا فريال ...
مهيتاب: خديني معاكي يا تانت
الست سعديه: هي اختك مالها؟
فريال: لا ابدا مافيش يا مدام سعديه .. وياريت ما تأخروش العروسه عشان انت عارفة يادوب حنعمل الفرح في الهوتيل والعرسان حيسافروا على طول...
الست سعديه: لا اا ااا انا متفقة مع اسم النبي حارسه ابنك .. انه الزفة بعد الهونيل لازم تكون من حارتها, وسط اهلها وناسها
فريال: بس وائل ما قاليش الكلام ده؟
الست سعديه: احنا اتفقنا على كده واللي اوله شرط اخره نور....
فريال: اوكي ..اوكي ... انا حتصرف... مع الولد وائل
مدام فريال تمشي
الست سعديه: انا حتصرف مع الواد وائل .!!! ماشي يا ختي ابقي علقيله الفلكة
الست فكيهه: مالك يا سعديه ؟ مالك ياام العروسه
الست سعديه: عكرتلي دمي الست دي؟ مش سامعاها بتقول ايه
فكيهه: ولا يهمك يا سعديه.. حاكم الناس الالفرانكه دول عليهم حاجات!!
بس ولا تزعلي نفسك ... بكره البت نبيهه تعرفهم احنا مين ؟
سعديه: تقصدي ايه يا فكيهه؟
فكيهه: ما اقصدش حاجة ياام العروسة
مالكوا يا بنات ما بتغنوش ليه
غني يا بت ياصفيه... زغرطي يا ام احمد
لولولولولولي
وتغني صفيه
ياحنا ياحنا ياحنا ياقطر الندى
يا شباك حبيبى يا عينى جلاب للهوى
ياخوفي من امك لا تدور عليك
لا احطك في عيني ياروحي واتكحل عليه
ياخوفي من اختك لا تدورعليه
لا احطك في شعر روحي
واتضفر عليه
الست سعديه تعيط... من الفرحه
الست ام مصطفى تهديها تروح معيطة معاها
الحاج ابو نبيهه يكلم الست سعديه على المحمول تستعجل العروسه عشان تلحق الكوافير للزفة
تنزل نبيهه ومعاها مامتها ونسوان الحارة لحاد العربيه
تطلع نبيهه وتروح للكوافير
نبيهه في العربيه مع مامتها
نبيهه: ليه الصربعه دي يا امه حنا وخله في ليلة واحده
الست سعديه: عريسك عايز كده نعمل ايه؟
نبيهه : الله ياامه هو كل حاجه نمشيها زي ما هم عايزين
سعديه: لااا ده انا صممت انهم لازم يرجعوكي واعملك هنا احلى زفة
نبيهه: ارجع هنا تاني يا امه.. حرام عليكي ..
نبيهه: حرمت عليكي عيشتك.. انت مش عايزة اهل حارتك يشوفوكي بفستان الفرح؟؟؟
نبيهه: حاضر يا امه اللي تشوفيه
الست سعديه: يحضرلك الخير يا نن عين امك...
الحاج ابو نبيهه يجبها من الكوافير ....
ويسلمها لعريسها في الهوتيل ....
وتبتدي الزفة.....
اتمختري ياحلوه يازينه
ياورده من جوا جنينه
ياعود قرنفل يا عروسه
والورد ضلل علينااا
صفيه قاعدة جمب مامتها الست ام مصطفى
صفيه: امااا ..اماااا
الست ام مصطفى: فين ايه يا بت سيبي هدومي
صفيه: بقى الواد الحليوه ده عريس البيت نبيهه ؟
ياخواااتي على جماااااله.. يهوس ياامه ياجنن
الست ام مصطفى: عيب يا ابت اتلمي..
صفيه: حسرة عليكي يا صفية
الست فكيهه: ولا حسره ولا حاجه يا عبيطة.. بكره يجلك سيد سيده
صفيه: وهو فين بس يا خاله
فكيهه: كول الاشحطه اللي قدامك دول مش ماليين عينك
صفيه: هما دول يجوا ايه جمب عريس نبيهه ياخالتي
فكيهه: اممم يعني انت عريس نبيهه هو اللي داخل دماغك!
صفية: ايوه ياخاله.. بس خلاص ما منوش فايده.. ا لمنحوس منحوس ولو حطوا على راسه فانوس
فكيهه: لا يا بت طول ما خالتك فكيهه معاكي ما فيش مشكلة الا وليها حل
صفيه: ازاي بس يا خالة؟
فكيهه: تجيلي بكره العصريه على شقتي .. وانا حقلك تعملي ايه...
صفية: بس دول حيسافروا شهر العسل في باريس.. باريس ياخالة..
الست سعديه: بتتودودو مع بعض وسايبنن المعازيم ؟؟
صفيه:اعمل ايه بس يا خالتي ؟. اصلي ما اعرفش حد هنا ...ونبيهه هيه صاحبتي الوحيدة
الست سعديه: عقبالك يا بت .. ربنا يرزقك بابن الحلال اللي يقدرك ويصونك
صفية: امييييين
الست ام مصطفى: من بقك لباب السما يا سعديه يا اختي...لولوولولولولوولولولي
صفية : الا قوليلي يا خاله.. الست اللي اسمها فريال تبقى ام سي وائل عريس نبيهه
اصلي سمعت ان الست امه تعيشي انت
الست سعديه: لااا دي مرات ابوه ..وهيه اللي ربته من هو عيل صغير زي امه .. تمام
والست اللي اسمها ...
صفيه: جلفدان ياخاله
الست سعديه: تبقى خالته اخت امه شقيقتها
.
صفيه: والخمس بنات ..اسم الله عليهم يبقوا اخواته من امه ولا من ابوه
الست : سعديه: من ابوه.. يعيني مالوش اخوات شققا
الست ام مصطفى: بطلي رغي يا بت ياحشريه
الست سعديه: ماتيسبيها يا ام مصطفى الله ..
صفيه: هي امي كده دايما نقراها من نقري مش عارفة ليه يا خاله
الست ام مصطفى: هي امك حمقيه بس قلبها زي اللبن الحليب
فكيهه: ما تنقطونا بسكاتكم خلونا نتفرج عــــ الناس اللي بتنطط زي القرود دي
ما تروحي تعملي زيهم يا بت صفية يمكن تفرج
صفيه: يانهاري .. ده كان مصطفى اخويا يقطع خبري
فكيهه: سيبك من اخوكي العبيط ده مش حينفعك .. اسمعي كلامي
الست ام مصطفى: تسمعك كلامك في ايه يافكيهه؟
فكيهه : ابدا كنت بقولها تهز طولها شويه... وتروح ويا البنات بدل ما هي قاعده من الستات العواجيز
الست سعديه: عندها حق يا ام مصطفى .. سيبي البت تشوف حالها
الست ام مصطفى بعصبيه: تشوف حالها يعني ايه؟.؟
الست سعديه: ما تتحمقيش قوي كده يا عزوزه يا ختي
ام مصطفى:يخيبك يا سعديه من زمان ما حدش ندهلي بالاسم ده ..
الست سعديه: طب وحياة نبيهه عندك ما تزعلي البت وتسيبها ترقص وتفرح زي اللي في سنها
الست ام مصطفى: ايوه يا ختي لكن...
الست سعديه: ما لكنش ولا حاجه.. مش يمكن تبقى ليلة السعد عليها.. وتحصل البت نبيهه
الست ام مصطفى: روحي يا بت .. روحي
تجري صفيه وترقص قدام نبيهه وعريسها
ابو وائل عريس نبيهه عمال يتفرج على صفيه ومبسوووط ومدام فريال متغاظه .. وهو ولا حاسس ......
يخلص الفرح
وتروح نبيهه وعريسها على الحاره وتتعملهم زفه تانيه وبعديها يطلعوا على المطار
يتبع....
