الست فكيهه قاعده في البيت .. مع شغالتها فتكات
بتفكر ازاي تروح لنبيهه وتوصلها الكلام اللي بيتقال عليها بطريقه تبين انها خايفه عليها ...
فكيهه: تعملي ايه يا فكيهه!! تعملي ايه!!
فتكات: هو انتِ لازم تقوليلها يا ستي؟
فكيهه: امال اسيبها على عماها
فتكات: ماهي مسيرها تعرف.
فكيهه: لااا..هو انا افديك الساعه لما ا شمت في الست سعديه .. ؟
فتكات: هي عملت فيكي ايه يا ستي
فكيهه: لولاها كان زماني متجوزه الحج ابو نبيهه.. غيرش هيا طلعت لي زي القضى المستعجل وخطفت الراجل...
فتكات: اهي.. معقوله يا ستي.. يعني لو كنت اتجوزتيه كان زمان الست نبيهه بنتك.. حسره عليكي يا ستي..وعلى حظك الاسود
فكيهه: اسود اما يسود عيشتك.. قومي فزي اعمليلي كوباية شاي.. انتي حتتسايري معايا!!
فتكات: الله ياستي !! هو ايه اصله ده؟!!
فكيهه: امشييي!!
فتكات: حاضر ..حاضر ..
فكيهه:فورتي دمي الهي يحرق دمك
اروح لنبيهه ويحصل اللي يحصل المهم ابرد ناري....
تروح الست فكيهه لشقة الست سعديه
فكيهه تخبط الباب ..
الشغاله تفتح الباب
الست فكيهه: ستك هنا يا بت
الشغاله: ستي!! ستي!!
الست فكيهه: ايه يابت مالك! جتتك اتلبشت اول ما شوفتيني
ايه لدغتك عقربه؟
الست سعديه: مين يابتعه؟
بتعة: دي الست فكيهه ياستي
الست سعديه: خليها تتفضل
نبيهه: انتِ ناويه على ايه يا امه؟
الست سعديه: هيه اللي ناويه مش انا ...
نبيهه: ياامه خالتي فكيهه جايه تزورنا وتباركلي ..عشان فرحي قرب
الست سعديه: ما تبقيش عبيطه وعلى نياتك .. الست دي جايه وراها مصيبه.. وحتقولي امي قالت
الست سعديه تطلع من الاوضه وتسلم على الست فكيهه
الست سعديه: يا الف اهلا وسهلا يا فكيهه يا اختي.. خطوه عزيزه
فكيهه مندهشه: الله يعز مقدارك يا سعديه يا اختي.. امال نبيهه فين؟
سعديه: الشاي يا بت يابتعه ؟ ولا ادوقلك من الكعك اللي عاملينه لفرح نبيهه!؟
فكيهه: هااا! انتوا علمتوا الكعك كمان؟
سعدية: طبعا عملنا الكعك والملبس .. وكروت الفرح ... بس انت مش محتاجه عزومه يا فكيهه يا اختي .. دي نبيه هزي بنتك
فكيهه: يعني سي الافندي خطيبها حيجوزها خلاص
الست سعديه: امال حيخللها!
بتعه الشغاله: الشاي والكعك ياستي
الست سعديه: اتفضلي الشاي ياختي
الست فكيهه: يزيد فضلك
فترة صمت,,,,
الست سعديه: انستي وشرفتي يافكيهه ياختي
الست فكيهه: ان شالله تعيشي ... اقوم انا عشان المعلم هنداوي زمانه جاي.. فتكو بعافيه
الست سعديه: يعافيكي يختي
نبيهه : مش قولت لك ياامه.. انت دايما ظالمة الست دي؟
الست سعديه: ظالماها؟ بس يا بت يا هبله ..الوليه دي مش حيهدلها بال الا اما تفركش الجوازه
نبيهه: ليه بس يا امه.. دي خالتي فكيهه طيبه ودايما بتوعيني وتفطمني.....
الست سعديه: استني بس وانا حثبتلك ان الست دي ما يجيش من وراها الا المصايب
بت يا بتعه.. انتِ يا بت..
بتعه: نعمين يا ستي
الست سعديه: عايزاكي تنزلي عند البت فتكات وتجرجريها في الكلام..تعرفيلي الست فكيهه كانت جايلنا ليه؟
نبيهه: استني يا بتعه ... وهي فتكات ايش عرفها يا امه؟
الست سعديه: حتعرفي دلوقتي .. انزلي يا بتعه
بتعه: حاضر يا ستي
تنزل بتعه لشقة الست فكيهه
تخبط على الباب
فتكات مين؟
بتعه: ان ابتعه يا فتكات
فتكات تفتح الباب
فتكات: في ايه يا بتعه ؟ عايزه ايه؟
بتعه: مالك يا فتكات ؟ مصدرالي الوش الخشب كده ليه؟
فتكات: مافيش .. بس اصل ..
بتعه: اصل ايه وفصل ايه.. مش طايقاني حمشي!
فتكات: خشي .. خشي بس بالراحه لحسن ستي .. متغاظه وعفاريت الدنيا بتتنطط فوق دماغها من ساعة ما نزلت من عندكوا
بتعه: خير الهم اجعله خير
فتكات: انا حقلك بس احلفي الكلام اللي حقولهولك يفضل سر بينا..
بتعه: سر في بير ...
فتكات: بيقولوا ان عريس الست نبيهه سابها عشان....
بتعه: عيب يا فتكات يا بتعه تقولي الكلام ده على الست نبيهه
فتكات: هو انا اللي بقول ! دي العماره كلها بتتكلم
بتعه: هي حصلت ؟ طب انا ماشيه قبل ما ستك تصحى
ترجع بتعه للشقه
الست سعديه: هااا عرفتي حاجه يا بتعه
بتعه: هااا.. لااا .. مافيش أي حاجه يا ستي
الست سعديه: بتعه.. انطقي سمعتي ايه؟
بتعه: استغفر الله العظيم...سامحني يا رب.. حكشف السر...
نبيهه: ما تقولي يا زفته..
بتعه: الحاره كلها بتقول ان عريس ستي نبيهه مش حيجوزها عشان...
نبيهه: عشان ايه ؟؟ قولي ....
بتعه: عشااان ...مشيها بطال..
نبيهه تمسك بتعه تضربها ...
بتعه تصرخ
بتعه: حرام عليكي يا ست نبيهه ..
الست سعديه: حرمت عليكي عيشتك
بتعه: هو انا عملت ايه .. انا قلت اللي سمعته
الست سعديه: سمعتي الرعد في ودانك...
بتعه: وانا مالي انا ..
ما تروحي تتخانقي مع الناس اللي بتتكلم.. ولا يعني مش قادرين على الحمار بتتشطروا على البردعه.
الست سعديه في قمه الغضب
بتزعق لبتعه..
انت كمان بتقلي ادبك .. انا حوريكي
وتنزل ضرب في بتعه
ونبيهه بتعيط ومنهاره
صوت بتعه والست سعديه يطلع لبره
الباب يخبط....
يتبع..... |
