المكان : شقة الحاج ابو نبيهه
الاشخاص: الست سعديه. الحاج ابو نبيهه.
ابو نبيهه: احم ..احم يارب يا ساتر
الست سعديه: خش يا حاج مافيش حد غريب
ابو نبيهه: ايه .. هي الست فكيهه مش عندك؟
الست سعديه: الست فكيهه عيانه في المستشفى من يجي اسبوع
ابو نبيهه: خير كف الله الشر
الست سعديه: الضغط والسكر ... (ولو انها وليه ترفع الضغط)
ابو نبيهه: لااا ..لااا طب عملتي الواجب..
الست سعديه: اه طبعا.. وبعتلها البت نبيهه تطمن عليها النهاردة الصبح
ابو نبيهه: ولسه ما جاتتش لحاد دلوقتي؟ احنا بقينا المغرب
الست سعديه: ياحاج الغايب حجته معاه...
ابو نبيهه: يا برودك ياوليه؟ اطلبيها على المحمول
الست سعديه: ماهي ما خدتوش معاها
ابو نبيهه: طب قومي .. قومي نروح ندور عليها ...
يروح الحاج ابو نبيهه والست سعديه المستشفى
الحاج ابو نبيهه: السلام عليكم يابني...
يرد موظف الاستقبال: وعليكم ...
ويسيب الست سعديه والحاج
الحاج ابو نبيهه: هو ماله سابنا ومشي؟
استنى بس يا حاج
الست سعديه : بقلك ايه يا ست الكتوره ...
برضه تمشي وتسيبها...
الست سعديه: الله .. هي الناس هنا جرالها ايه؟
الست سعديه تمسك في ست كبيره بتمسح ارض الصاله في المستشفى
هو في ايه يا حاجه؟
ست كبيره بتمسح الارض: اسكووووتي.... مش الميتين اللي هنا بيتكلموا
الست سعديه: بسم الله الرحمن الرحيم.. بسم الله الرحمن الرحيم ... انت بتخرفي يا وليه
ست كبيره بتمسح الارض: مش مصدقاني .. تعالي معايا وانتِ تشوفي
الست سعديه: اشوف ايه يا وليه يا مجنونه
ست كبيره بتمسح الارض: براحتك ..
الحاج ابو نبيهه: في ايه يا حاجه؟
الست سعديه: بتقولك الميتين اللي في المستشفى بيتكلموا ويا العيانين والدكاتره .. وبيشربوا شاي وقهوه......
الحاج ابو نبيهه: بس يا وليه بلاش تخريف..
الست سعديه: وانا مالي يا اخويا .. هو انا اللي بقول؟!
الحاج ابونبيهه : اما وليه مخبوله بصحيح
الست سعديه: انا رايحه اتفرج يا حاج
الحاج ابو نبيهه: تتفرجي على ايه بس؟ هو احنا جايين ندور على البت ولا نتفرج على التخاريف دي؟
الست سعديه: مش حنخسر حاجه يا حاج.. نشوف اللي بيقولوا عليه.. وبالمره ندور على البت في سكتنا...
الحاج ابو نبيهه: يا وليه ايه اللي جرالك .. انتِ ما كنتيش كده؟
الست سعديه: ما هو انا اول مره اسمع حاجه زي دي!!
تعالى نتفرج يا حاج يلا .. يلااا
الست سعديه والحاج ابو نبيهه يوصلوا للمشرحه
الحاج ابو نبيهه يسأل ...
هو في ايه يا بني ؟
عسكري واقف على باب المشرحه: اصلهم لقوا اتنين ستات حطوهم في الثلاجه وهما لسه عايشين
الست سعديه: وهما ايه اللي دخلهم المشرحه اصلا ؟
عسكري : هما كده الستات بيتحشروا في ايه حاجه
الست سعديه مقموصه ( اما راجل قليل الربايه بصحيح)
الست سعديه: طب وفين الميتين اللي بيفطورا ويتغدوا ويا الدكاتره والعيانين
عسكري: انت بتصدقي الكلام ده يا حاجه .. مافيش حاجه من دي...
الحاج: مش قولتلك ياوليه...
الست سعديه: استنى بس يا حاج
قولي يا بني وعرفوا هما مين؟ ودخلوا ازاي .................
العكسري: وانا ايش عرفني ؟!ا خد الحاجه وامشي من هنا يا عم الحاج .. انا مش عايز وجع دماغ
الحاج ابو نبيهه: يلا يا وليه .. يلا جيبتلنا الكلام
وفجأه تطلع نقالتين فيها اتنين ستات تقريبا متجمدين من جو المشرحه ...
الست سعديه تبص في واحده فيهم ..
يا لهووووي دي نبيهه .. نبيهه بنتي
الحاج ابو نبيهه: وايه اللي حيدخل بتك هنا ؟ مش بتقولي انها راحت تزور الست فكيهه
تلاقيها عندها هناك في العنبر
الست سعديه: استنى يا حاج ..
وتبص الست سعديه في النقاله التانيه
يانهااار اسود دي الست فكيهه.............
يتبع.......... |
