طفولة شهـــــــد: خالتي فكيهه ٢٢

المكان: المستشفى
الاشخاص: المعلم هنداوي.. الحاج ابو نبيهه.. الست سعديه

الحاج ابو نبيهه: الحكايه ومافيها يا معلم .. ان الست حرمكم المصون ....
كانت بعافيه شويه.. والبت نيبهه بنتي جات تزورها .....فتأخرت شويه .. جينا ندور عليها لقيناها...

الست سعديه: لقيناها في تلاجة الميتين مع وش المصايب مراتك

المعلم هنداوي: يعني الوليه مراتي .... ماتت. . لا حول ولا قوه الا بالله.... قبل ما تكتبلي حتة الارض؟!!

الست سعديه: لا اطمن دي زي القطط ...
الحاج ابو نبيهه: ياراجل .. كل اللي همك الارض ..و مراتك؟

المعلم: مراتي ايه ؟ دي وليه تقرف الكلب الجربان.

الحاج ابو نبيهه: عيب يا راجل .. دي ام عيالك!!

الست سعديه: هو ده وقته ياراجل انت وهو ؟
الحاج ابو نبيهه: عندك حق يا حاجه..
المعلم: ايوه صحيح .. هو ايه اللي دخلهم ثلاجة الميتين اصلا؟

الست سعديه: واحنا ايش عرفنا !!

تعدي حسنات

حسنات: انا اقلك يا عم الحاج

الحاج ابو نبيهه: الله ساميعنك يا ست الممرضه
حسنات: الرييسه

المعلم هنداوي: قولي يا ست الرييسه

الوليه اللي اسمها فكيهه: خرجت من اوضتها على ولا مؤاخذه على بيت الادب .... ومعاها واحده اسمها نبيهه

الست سعديه: ا يوه نبيهه بنتي.. هه وبعدين؟

حسنات: ولا قبلين .. الاتنين فص ملح وداب.. وفجأه لقيناهم في المشرحه .. جوا الثلاجه..

الست سعديه: يا سلااام!! دخلوها لوحدهم يعني؟
حسنات: ما احنا لسه بنحقق في الموضوع.. ولما نوصل لنتيجه حنبلغكم

الست سعديه متنرفزه..تمسك في حسنات من رقبتها

مابلاش استعباط ياوليه انت.. احنا لسه حنستنى التحقيق؟

حسنات: نزلي ايدك يا ست انت.. لحسن والله.... افعصك تحت رجليا...

ا لحاج ابو نبيهه : تفعصي مين يا قليلة الربايه!!
المعلم هنداوي: سيبهالي يا حاج.. انت مالكش في النسوان اللبط دول!!
المعلم هنداوي بيشمر :
بسم الله واكبر ....

حسنات: تف.. تف.. تف... ..رعبتني يا راااجل.. جتتي اتلبشت ؟

لو كنت انت جزار.. فا انا بنت حنوتي ... وحدوووووه

ست ابوها تعدي: في ايه يا حسنات؟

حسنات: مافيش ياست ابوها.. . روحي شوفي شغلك

ست ابوها : مافيش ازاي وصوتك واصل لحاد المديره!!
حسنات: مديرة ايه؟ ولا يهمني..

ست ابوها: دي راسها والف سيف لترفدك..
حسنات : ترفد مين! ده انا كنت اخلي فضيحتها بجلاجل!!!

الحاج ابو نبيهه: هو احنا في مستشفى ولا في زنقة الستات ؟

مافيش حد محترم نتكلم معاه في المخروبه دي؟

وفي نفس الوقت تيجي الممرضه نورا..

الممرضه نورا: خير ان شاء الله يا حاجه اي خدمه؟
الحاج ابو نبيهه: ايوه يا بنتي الله يكرمك... عايزين نعرف اخبار البت بتي ومافيش حد راضي يدينا عقاد نافع

نورا: بنتك اسمها ايه يا عم الحاج
الست سعديه: نبيهه..

المعلم هنداوي: ومعاها حرمونا اا الست فكيهه

الست سعديه مصمصة شفاايف: الست حرموكم .. ده ايه الادب ده!!
المعلم هنداوي: هو في حد يشوف القمر ده وما يبقاش متأدب!!

نورا: اتفضول معايا.. عند المديره وهي حتفهمكو على كل حاجه

حسنات: مش قبل ما اخد حقي من الراجل الجعر ده!!

نورا: عيب يا حسنات مايصحش ...

حسنات: عشان خاطرك انت بس يا سكره ..
نورا : ميرسي يا حسنات.. انفضلوا معايا

الحاج ابو نبيهه: توكلنا على الله

المعلم هنداوي: يا معين...

ويدخل الحاج ابو نبيهه والمعلم هنداوي لمكتب المديره

الحاج ابو نبيهه: السلام عليكم ورحمة الله

المديره: وعليكم السلام ورحمة الله.. اتفضلوا يا معلمين...

اتفضلي يا حاجه..

الست سعديه: هيه الست المسلوعه دي هيه المديره؟
الحاج ابو نبيهه: ما تلمي لسانك يا وليه.. لا تسمعك
المديره: طلاباتك يا حاج؟

الحاج ابو نبيهه: عايز اعرف ايه اللي حصل لبنتي .. ومراة المعلم هنداوي
نورا توضح للمديره: يقصد الحاجه فكيهه. والانسه نبيهه؟
المديره: ااااه .. اللي لقوهم في الثلاجه؟

دول نسوان عايزين الحرق... اتخانقوا مع اتنين تمرجيه ..وضربوهم وخدو المفاتيح .. عشان كانو ا عايزين يسرقوا
جتت الميتين.. .. ويبيعوهم قطع غيار..

الست سعديه:انت عبيطه ياوليه انت.؟ هو جسم البني ادمين بقى قطع غيار؟
المديره: يعني انا كذابه يعني؟
انسه نورا
نورا: افندم
المديره: روحي اندهي على عطوه وعبد المعطي
نورا : حاضر ..

يدخل عطوه وعبد المعطي

افندم يا ست المديره.. كل وحد فيهم رابط دماغه .. وراشين دم..

المديره: هما دول اللي نسوانكو ضربوهم

الحاج ابو نبيهه: بنت انا تضرب دووول؟

عطوه: ايوه يا حاج ضربتنا بالشوم..
عبد المعطي: وانا خبطتني على دماغي .. بمفتاح انجليزي

المديره: صدقتوني....

المعلم: ولنفرض ان كلامك صح .. ايه اللي دخلهم جوا الثلاجه؟

عطوه: لما التمرجي المناوب شافنا متكومين على الارض ... ما بنحطش منطق .. والاثنين دول فص ملح وداب
دور في كل حته وفتح المشرحه.. سمع صويت وزعيق .. فتح الثلاجه لقى الوليتين جوه

المعلم هنداوي: الكلام ده ما يدخلش دماغي بمليم احمر...

الحاج ابو نبيهه: ولا يدخل دماغي انا كمان.. احنا لا زم نبلغ على ا لمستشفى دي يا معلم هنداوي

المعلم: اي نعم وانا معاك ...

الست سعديه: مش قبل ما اطمن على بنتي

المديره: عايزه تطمني على بنتك.. قولي لجوزك ما يبلغش.. وبعدين مش حتستفيدوا.. احنا لا شوفنا لا بنتك ولا مراته؟؟

الست سعديه: نهارك اسود ..

المديره: مش حرد عليكي.. عشان انت ست موش محترمه...

الحاج ابو نبيهه: ه اللهم طولك يا روح... اسكتي يا حاجه ... اما نشوف اخرتها

المديره:بقلك ايه يا حاج ... بضاعكتوا عندنا عايزنها.. تقفل بقك منك ليه؟

مش عايزنها.. ورونا عرض كتافكو..
الست سعديه: نهارك اسود ومطين بطين ......انا عايزه بنتي

المعلم هنداوي : وانا مش طالع من هنا الا ومراتي في دراعي. انجاجيه

الحاج ابو نبيهه : انجااا ايه يا معلم؟!

المعلم هنداوي: انا عارف .. الله يخرب بيت الافلام المورنسايه.....
الحاج هنداوي: الله على الافلام دي.. بيجبوا بنات زي لقطة القشطه.. مش الغفر اللي عندنا

الست سعديه: ما تتلم ياراجل منك ليه!!!

الحاج هنداوي: مش قلت لك... احنا متجوزين غفر.........

المعلم هنداوي: موافقين يا ست الدكتورة.. مش حنبلغ..

المديره: ما كان من الاول... وصليهم لاوضه فكيهه ونبيهه يا نورا

نورا: تحت امرك يا افندم...

تدخل الست سعديه لاوضه نبيهه وجمبها الست فكيهه

نبيهه بتترعش: الحقيني يا ااامه

الست سعديه: يا حبيبتي يا بنتي..

الست ساعديه تاخد نبيهه في حضنها..
يدخل الحاج ابو نبيهه:

احم ..احم .. يارب يا ساتر
الست سعديه .. خش يا حاج شوف بنتك واللي جرالها...

يدخل الحاج ابو نبيهه: الف سلامه عليكي يا بنتي..

نبيهه: اه يا اني ياااابه.. شوفت اللي جرالي

الست فكيهه : وانا مافيش حد يطمن عليا.. يخادني في حضنه...

الست سعديه: كله منك انت.. اجوز البت ازاي ؟ اقول لعريسها ايه ؟؟

نبيهه: عريسي؟؟ هو عرف اي حاجه؟؟ يالهوووي.. مش حتجوز يااامه

الحاج ابو نبيهه: عريس ايه وزفت ايه؟؟ مش لما نعرف نطلعك من هنا الاول

نبيهه: يا مصيبتي.!! انا عايزة اطلع من هنا.. عريسي حيضيع مني؟

المعلم هنداوي: ياحاج ابو نبيهه...
الحاج ابو نبيهه: نسينا المعلم هنداوي بره.. اتفضل يا معلم..
المعلم هنداوي : الست حرمونا فين؟

فكيهه بصوت مرتعش : انا هنا يا سبعي .. تعالى ..خدني في حضنك....

المعلم: خدك عفريت.... ا تلمي يا وليه..

الست فكيهه: واتلم ليه مش جوزي ..حلالي...

المعلم هنداوي: انت اتهبلتي .. ولا باينلك عايزاني ارقعك قلمين على سداغك .. اعدلك دماغك الخربانه دي؟

الست فكيهه: لا يا معلم ابوس ايدك.. انا كل حتة في عضمي مدشدشه... حاكم تلاجتهم ضيقه ....مش زي....

الست سعديه تضحك ضحكة ساخره: مش زي الثلاجه اللي بيكومك فيها...

الست فكيهه: ان ماوريتك يا سعديه.. امااقوم بس...

الست: ده انا اللي حوريكي ياوليه يا مفتريه...

الصوت يعلى .. تدخل حسنات

فكيهه .. مييين؟ سيئات!! الحقني يامعلم...

نبيهه: ما تسبينيش يا ااامه...حوش الست دي عني يا اابه

المعلم هنداوي: هي الست دي عملت فيكوا ايه؟

نبيهه: ما عملتش ....مش كده يا خالتي

فكيهه: تمام كده يا بنتي.... طلعني من هنا ابوس ايدك يامعلم

نبيهه: وانا يا ابه.. مش عايزه ابات هنا اللي دي..

تتفق المديره مع الحاج ابو فكيهه والمعلم هنداوي ويطلعوا فكيهه ونبيهه

ويوصللوا كلهم لحارتهم.....

يتبع....