بعد اسبوع......ليلة الحنا...
فكيهه قاعده ببتفرج على التلفزيون.. وفتكات في المطبخ بتحضر الفطار
تسمع هيصه ودوشه
فكيهه: بت يا فتكات .. انتِ يابت
فتكات: نعمين يا ستي
فكيهه: ايه الدوشه اللي بره دي
فتكات: بيعلقوا زينات فرح الست نبيهه
فكيهه: اهيي... هو الفرح امتى يابت؟
فتكات: النهارده الحنا والزفه في ليله واحده يا ستي
فكيهه: شوف الوليه الناقصة.. حتجوز بنتها وما تعزمنيش..
فتكات: الباب بيخبط يا ستي
بتعه: سالخير يا بتعه؟ امال فين ستك
فكيهه: عايزة ايه يا بت يا بتعه
بتعه: ستي بتصبح عليكي.. وتقولك تشرفينا النهارده المغربيه حنة الست نبيهه
فتكات: لسه افتكرتني دلوقتي ... طيب
بتعه: فتك بعافيه يا فتكات
فتكات: يعافيكي ياختي
فكيهه: انا رايحه شقة الست سعديه
فتكات:ده لسه بدري يا ستي
فكيهه: معلش انا حعمل بأصلي واشوفهم لو محتاجين حاجة..
فكيهه تطلع شقه الست سعديه تلاقي الباب مفتوح
فكيهه: لولولوولي ...ولولوولوولولي...ولولوولولولوولي
ياالف نهار ابيض ياالف نهار مبروك...
الست سعديه: يا الف اهلا سهلا يا فكيهه يا ختي
فكيهه: بقى كده يا سعديه .. تعزميني زي الغرب .. مش كنت تقولي من بدري على الاقل كنت اقوم بالواجب..على العموم احنا لسه فيها.. المعلم هنداوي جوزي راسه والف سيف .. لا يدبح تور عند باب بيتكو ويفرقه على كل اهل الحاره... وهديتي انا حديها لنبيهه بنفسي
الست سعديه: خيرك سابق يا فكييهه يا ختي..
فكيهه: هو انا افديكي الساعه لما افرح بحبيبة قلبي نبيهه.. هي فيمن امال؟
الست سعديه: جوه في اوضتها
الست فكيهه: طب انا داخله اباركلها
الست سعديه: البيت بيتك اتفضلي
فكيهه تدخل اوضة نبيهه
نبيهه: اتفضلي يا خاله
فكيهه: لولووولووي.. الف مبروك يا نبوهتي.. الف مبروك يا حبيبتي
نبيهه: يبارك فيكِ ياخالتي ...
فكيهه: بصي يانبيهه .. في كلمتين عايزة اقولهملك تحطيهم حلقة في ودانك
شفيقه صاحبة نبيهه: طب استأذن انا يا نبيهه
فكيهه: إذنك معاكي يا حبيبتي
نبيهه: ايوه ياخاله سامعاكي
فكيهه: يغلبك بالمال ... اغلبيه بالعيال.... ولا مليم
نبيهه: ازاي بس يا خالة.. يعني اسيب الراجل من غير فلوس
فكيهه: ايوه طبعا.. ولو احتاج حاجه ياخد مصروفه منك.. وبالمعقول.. ما تكتريش
نبيهه: معقوله يا خالتي
فكيهه: اسمعي كلامي وانتِ تكسبي... وحماتك.. اعوذ بالله من الحماه .. اوعي يا بت تسمحيلها تتحشر بينك وبين جوزك!! ولو داستلك على طرف.. تقوليله على طول.. امك سوت .. امك عملت.. واوعي تخليه يقعد مع ابوه وامه لوحديهم... كل ما امه تندهله تروحي طابه عليهم زي القضا المستعجل
نبيهه: طب افرضي عندهم كلام عايزين يقولوه لبعضيهم
فكيهه: حيقولوا ايه يعني؟. وبعدين انتِ مراته يعني مش غريبه.. لازم تعرفي عنه كل كبيرة وصغيرة
نبيهه: وايه كمان ياخاله؟
فكيهه: اوعي يا بت حماتك تقولك بوسي راسي ولا ايدي؟ وانا زي امك والكلام الفاضي ده
تسلمي عليها بطراطيف صوابعك وتبصيلها بنص عين..
نبيهه: ما يصحش يا خاله ...
فكيهه: لا يصح يا بت .. ترفعي راسك فوق قوي وانت بتكلميها.. ولو اشتكت لجوزك
تبتدي في حركات الدلع .. وتعيطي .. تقوليله امك مش طايقاني.. امك بتكرهني.. لحاد ما تكرهيه في امه ويبقى ليكي لوحدك
نبيهه: ليا لوحدي.؟؟ ازاي بس
فكيهه: زي ما بقلك كده ... حاكم الحموات دول لازمن ولا بد توريهم العين الحمرا من اولها.. ولا حتركب على دماغك وتدلدل رجليها
نبيهه: عندك حق يا خاله.. حاكم حماتي دي وليه فشارة وطالعه في العالي مش عارفة على ايه؟
فكيهه: ما عشان كد ه بقولك تعرفيها مقامها من اولها
نبيهه: طب وحمايا
فكيهه: لااا حماكي ده حاجه تانيه.. لازم تخليه يحبك وتصاحبيه.. وتخدميه بعنيكي
عشان كل ما مراته تشتكيله منك ... يكذبها ويقولها ما البت زي الفل اهيه .. انت اللي مفتريه
نبيهه: خالتي ما قولتيلش اعمل ايه ليلة الدخله؟
فكيهه: نعم يا اختي؟؟
نبيهه: ياخاله ما اقصدش ..قصدي يعني اشيل الاخضر والاحمر ولا ايه ؟
فكيهه: اه طبعا:بعد ما تشيلي الاخضر والاحمر.. تحطي من العلبة دي .. وترشي من الكلونيا والبدرة دول.. انا عملاهملك مخصوص من عند عم عشماوي العطار
الست سعديه: يلا يا نبيهه شهلي اهل العريس وصلوا
فكيهه تبوس نبيهه: الف مبروك ياروح خالتك....لولوولوي,,,,لولولوولولي
تخرج نبيهه ووراها صاحبتها وجيرانها بيزفوها ويغنولها...
مدي ايدك يا عـروسه.. مدي ايدك للحنة...
مدي ايدك يا عـروسه.. مدي ايدك وتحنَي...
تقوم الست سعديه والست ام مصطفى ويردوا عليهم
بس الوله يجي.. بس الولة يجي...
يجى عند دارنا .. وادبحلة حمامنا ، واشاورلة يجى
يجي عالتسريحة.. وأحطلوا ريحه...
يتبع.... |
