نبيهه تفتح وهي بتعيط تلاقي الست ام مصطفى وبنتها صفيه والست فكيهه وشغالتها فتكات
الست ام مصطفى: خير اللهم اجعله خير يانبيهه يا بنتي ؟ صوتكو جايب لاخر ...
نبيهه مش قادره تتكلم ...
صفيه تحاول تهديها...
الست فكيهه: امك فين يابت يانبيهه
تطلع الست سعديه شاده بتعه من شعرها
انا هنا يازفت الطين ياللي اسمك فكيهه
الست فكيهه: الله يسامحك.. انا في بيتك برضه
الست ام مصطفى: مايصحش يا ام نبيهه الست جايه تطمن
الست سعديه: هو ايه اللي ما يصحش .. روحي اسأليها بتقول ايه هي وشغالتها على نبيهه بنتي
؟
الست فكيهه: انا ماقولتش حاجة ياختي.. هي بس سعديه دايما كده قارشه ملحتي.
تطلع نبيهه من الاوضه: لا يا خاله .. البت فتكات قالت للبت بتعه ان عريسي حيسبني.....
وتعيط نبيهه بحراره
الست ام مصطفى: ويسيبك ليه يعني. د ه انت ست البنات هو يلاقي زيك فين؟.
الست سعديه: يسلم فمك يا ام مصطفى يا اختي..
الست فكيهه: اه امال.. دي نبيهه دي نوارة حارتنا
الست سعديه: شوفا لوليه ؟! ايش حال لو ما كانتش الشغاله بتاعتك قالت للبت الكلام ده وكلام تاني من قادره انطقه ..... عن نبيهه بنتي
الست فكيهه تنده على شغالتها اللي دخلت المطبخ جو مع بتعه
الست سعديه تنده على فتكات
الست سعديه: انت يا بت مين اللي قالك الكلام اللي قولتهولي
بتعه: كلام ايه يا ستي
الست سعديه: انت حتستعبطي
بتعه: لا والله يا ستي ما بتستعبط ..
نبيهه: يازفتت الطين مش انت قولتي انت البت فتكات قالت لك ان عريسي مش حيجوزني عشان ...
بتعه: انا قولت كده.. يتقطع لساني ..
الست سعديه: وانت يابت يا فتكات؟
فتكات: انا ايه يا ست سعديه؟ هو انا اقدر اقول كلام زي ده .. دي الست نبيهه خيرها عليا
الست ام مصطفى: كده ظلمتي الست فكيهه يا ست سعديه؟
ولازم تطيبي خاطرها
الست سعديه: انا برضه اللي طلعت غلطانه..
الست ام مطصفى: ايوه غلطانه والغلط راكبك من ساسك لراسك..
الست فكيهه بتعيط بدموع تماسيح: حسره عليكي يافكيهه.. دايما مظلومه ..اكمنك غلبانه ومقطوعه من سجره
الست ام مصطفى: قومي استسمحي الست فكيهه يا ام نبيهه والا قسما عظما ما انا داخلالك بيت
تقوم الست سعديه تبوس راس الست فكيهه
وكلهم يروحوا على شققهم
نبيهه: انت ياهبابه ياللي اسمك بتعه
بتعه: نعم يا ستي
نبيهه: لمي حاجتك وامشي من هنا انا مش عايزة اشوف وشك.. طلعيها بره يا اامه
الست سعديه : مش سامعه بتقولك ايه غوري يا بت غوري
بتعه: اروح فين يا ستي ؟ انا ذنبي ايه بس
الست سعديه: ذنبك انك كذابه .. وخلتيني انا سعديه ابوس على راس الحربايه فكيهه
نبيهه: بره.. بره
وتطلع فكيهه لامه بؤجتها من شقة الست سعديه
تلاقي الحاج ابو نبيهه على السلم
الحاج ابو نبيهه:مالك يابت في ايه؟
بتعه: ستي سعديه وستي نبيهه طردوني.. ابوس ايدك يا حاج.. ابوس رجلك.. انا ماليش حته اروحها!!
الحاج ابو نبيهه: استغفر الله العظيم ..قومي يا بت ما تعمليش كده..
الحاج ابو نبيهه يفتح الباب وفي ايده البت بتعه
الست سعديه: ايه اللي رجع البت دي هنا..
الحاج ابو نبيهه: عايزاها تروح فين يا حاجه؟ دي مالهاش غيرنا
الست سعديه: تروح في ستين داهيه. اصلك مش عارف هيه عملت ايه
وتحكي الست سعديه للحاج ابو نبيهه كل الحكايه..
الحاج ابو نبيهه: الكلام ده صحيح يا بتعه
بتعه: اصل يا حاج ..انا..
الحاج ابو نبيهه: انطقي يا بت ....
بتعه: ايوه يا حاج .. البت بتعه والبت نبويه وكلنا عارفين الكلام ده
الحاج ابو نبيهه:يانبيهه.. بت يا نبيهه
نبيهه: نعم يا اابه
الحاج ابو نبيهه: عريسك غير رايه ليه؟ شاف عليكي ايه؟
الست سعديه: سيب البت يا حاج .. حتموت في ايدك
الحاج ابو نبيهه دمه يغلي ويروح عند عريس نبيهه ؟؟ عايز يعرف ايه الحكايه؟
نبيهه: قولتي لابويا ليه بس يا امه .. انت مش عارفه ان دمه حامي ؟ حيروح يتخانق مع عريسي .. مش حتجوز!! مش حتجوز....
الست سعديه: اهمدي يا بت خليني اعرف اشوف صرفة في المصيبه دي...
الست سعديه: ايوه لقيتها.. حكلم ام سي وائل عريسك..
نبيهه : تكلميها تقوليلها ايه يا امه؟
الست سعديه:حفهم منها بصنعة لطافه كده ايه العباره
الست سعديه تطلب ام عريس نبيهه
الووو ساالخير يا ختي..
الشغاله الفليبنيه :يس... من يتكلم؟
انا الست سعديه ام نبيهه.. عايزة اكلم المودام
الشغاله الفليبنيه: دقيقة واخد اكلم مدام...
مدام فريال والدة وائل:
مين يا ميري ؟
ميري الشغاله الفلبينيه: ده مدام سأديه ..المام بتأة اروسه بتاء مستر وائل..
مدام فريال: الوو
الست سعديه: الوو .. ازيك يا فريال ياختي عامله ايه
مدام فريال: اهلا يا مدام سعديه .. خير ان شاء الله
الست سعديه: كل خير يا اختي .. اصلي شفتك ما بتسأليش قولت اسأل انا؟ هو سي وائل اخباره ايه؟
مدام فريال: وائل بخير الحمدلله.. بس هو مشغول شويه ...
الست سعديه: مشغول في ايه؟ قصدي...
مدام فريال: مافيش داعي للقلق يا ست سعديه.. الفرح ان شاء الله في ميعاده..
الست سعديه: لا مش قصدي .. انا بس بطمن عليه.. ما هو ابني برضه...
مدام فريال: اه طبعا .. طبعا..
الست سعديه: طب مش عايزن حاجه يا فريال يا حبيبتي
مدام فريال: اشكرك يا مدام سعديه
الست سعديه: الشكر لله..سلام عليكو
نبيهه: قالت لك ايه يا امه..
الست سعديه: كل خير .. الفرح في ميعاده ..
نبيهه: صحيح يا امه... لولولوولولي.. حتجوز.. حتجوز.... لوولولولولولي
وفجأه تسكت نبيهه:
الست سعديه: مالك يابت ؟
نبيهه: ابويا يا امه.. ابويا .. تلاقيه راح لسي وائل وعمل مصيبه؟
الست سعديه : أي والله يا بت.. يادي الحوسه ... استني اما اشوف من الشباك يمكن يكون لسه ما راحش
نبيهه: يا امه ده نازل بقاله نص ساعه .. زمانه طلع من الحاره
الست سعديه: طب والعمل؟
نبيهه: اتصرفي ياامه ! مش عايزه جوزي يروح مني
الست سعديه: جوزك ايه يا مقصوفة الرقبه! هو لسه كتب عليكِ
نبيهه: حيبقى جوزي يا امه .. حيبقى جوزي .. اتصرفي والا حموت نفسي هه
الست سعديه: يادي الحوسه وانا حعمل ايه دلوقتي ؟
الست سعديه رايحه جايه في الشقة..
شويه تفتح الباب وشويه تبص من الشباك
وهي بتبص من الشباك تلاقي الواد بيومي صبي المعلم .... القهوجي
الست سعديه: واد يا... ما شفتش الحاج ابو نبيهه؟
بيومي: ايوه يا ام نبيهه لسه طالع من القهوه
الست سعديه: اجري الحقه يا بيومي قوله الجماعه عايزيزنك
بيومي يجري عشان يلحق الحاج ابو نبييهه...
ياحاج .. يا ابو نبيهه .. يا حاج...
الحاج ابو نبيهه يركب العربيه ويمشي...
بيومي يرجع للست ام نبيهه..
الست سعديه: هااا لحقته
بيومي : لا والله يا حاجه.. فص ملح وداب
نبيهه: يا مصبتك يا نبيهه.. يا ميلة بختك .. عريسك راااح.. ماحدش حيجوزك .. ااااه يا ااااني
الست سعديه: ولا يهمك يا بت.. انا حتصرف...
نبيهه: حتعملي ايه يا امه
الست سعديه: حركب تاكس والحق ابوكي.. اكيد حيروحله على الشغل
نبيهه: هو انت يعني عارفه الشغل فين؟
الست سعديه: حاخد الواد بيومي ..يدور معايا .. واللي يسأل ما يتهوهش...
تنزل الست سعديه وتاخد الواد بيومي...
الحاج ابو نبيهه يوصل قبلهم ويسأل على وائل خطيب نبيهه
الحاج ابو نبيهه: سلام عليكو
موظف الريسبشن: وعليكم السلام ورحمة الله.. أي خدمه يا افندم
الحاج ابو نبيهه: انا الحاج محمود.. حمى الاستاذ وائل
موظف الريسبشن: اهلا يا افندم .. اتفضل استريح ادي خبر لوائل بيه..
موظف الريسبشن يكلم السكرتاريه.. توصله لوائل...
وائل : الو ايو يا ابني .. خليه يتفضل فورا ..
تنزل السكرتيره:
موظف الريسبشن: اتفضل يا حاج .... الانسه حتوصلك
الحاج ابو نبيهه : الجمال ده كله حيوصلني انا .. ويقولولي اللي عندي دي ست.. دي ست اشهر
السكرتيره: اتفضل يا حاج البيه في انتظارك
وائل خطيب نبيهه يطلع يقابل الحاج ابو نبيهه عند باب المكتب
وائل: اهلا .. اهلا يا عمي... شرفتني.. تشرب ايه
الحاج ابونبيهه: انا مش جاي اضايف يا ابني .. انا جاي اقولك كلمتين ورد غطاهم
وائل: طب اشرب حاجه الاول وقول اللي انت عايزه..
بعد ما يشرب الحاج ابو نبيهه القهوه : بص يا ابني الله .. الله على الجد والجد الله الله عليه
انت المفروض كتب كتابك على بنتي الاسبوع الجاي.. وانا سمعت كده انك عايز ....
وقبل ما الحاج ابو نبيهه يكمل كلامه... تدخل السكرتيره ولسه حتكلم وائل ان في واحده عايزه تقابله..
تلاقيها دخلت فجأه.....
الحاج ابو نبيهه: انتِ ايه اللي جابك يا وليه انتِ
وائل: حمايا وحماتي عندي.. ده ايه السعاده الي انا فيها...
الكلام مش حينفع هنا .. انا عازمكم على الغدا ونكمل كلامنا
الحاج ابو نبيهه: يا ابني انا مش جاي اتغدى ولا أي حاجه... انا بس
الست سعديه: ياراجل .. بيقلك عازمك .. حتكسف عريس بنتك ؟
وائل: اتفضل .. اتفضل يا عمي...
الحاج ابو نبيهه: امري لله
يخرج وائل ومعاه حماه وحماته عشان يتغدوا في المطعم اللي بيحب وائل يتغدى فيه دايما
الجرسون: اهلا وسهلا يا وائل بيه
وائل: اهلا يا رمزي... انا معايا ضيوف ...
الجرسون: تشرفونا يا افندم
ويجهز التربيزه
الست سعديه: ياحلاوة.. ياحلاوة... بسم الله ماشاء الله.. بسم الله ما شاء الله...
الجرسون يجيب المنيو:
الست سعديه ماسكه المنيو ومحتاسه
الحاج ابو محمود ابو نبيهه: بقلك ايه يا بني .. احنا ولاد بلد ومالناش في الاكل ده..
وائل: خلاص يا حاج انا حطلب لك على ذوقي
ويطلب وائل الاكل.. وبعد ما خلصوا
وشربوا القهوه والحلو
وائل : انا سامعك ..كنت بتقول ان فرحي انا والانسه نبيهه الاسبوع الجاي؟
الحاج ابو نبيهه: اه بس انا سمعت ا نك ناوي...
الست سعديه: مش ناوي الا على كل خير .. مش كده يا ابني.. الست والدتك لسه مكلماني ..
وقالت لي ان كل حاجه جاهزه وان الفرح في ميعاده
الحاج ابو نبيهه: مندهش
الست سعديه: بس انا ليا طلب عندك.. بس عشان خاطر نبيهه ما تكسفنيش
وائل: تؤمريني يا حماتي
الست سعديه: ما يؤمر عليك ظالم يا عريس بنتي... انا كنت بس عايزه بعد ما تعملوا الزفه في الاكانده العشر نجوم ...
الحاج ابو نبيهه: اسمه هونتل خمس نجوم يا جاهله
الست سعديه: يا راجل اهي كلها اكاندات.. سيبك منه يا سي وائل واسمعني
وائل : تحت امرك
الست سعديه: عايزه اعمل زفه في الحاره.. تتحاكى بيها الحاره
وائل : وانا ما اقدرش ارفضلك طلب...
الست سعديه: ان شالله تسلم يا ضنايا
يرجع وائل ومعاه الست سعديه والحاج ابو نبيهه للشركه..
ياخد الحاج ابو نبيهه عربيته ويلاقوا الواد بيومي عند الباب
بيومي: رحتي فين يا حاجه وسبتيني هنا
الست سعديه: يا نغه ..
الحاج ابو نبيهه: اركب يا واد حنرجعك معانا
الست سعديه: يركب فين .؟ اجري خد اتوبيس ولا توتوك ارجع فيه
بيومي: امري لله .. وليه مفتريه بصحيح
يرجع الحاج ابو نبيهه والست سعديه للبيت ويلاقوا نبيهه مستنياهم....
نبيهه: عملتوا ايه يا امه؟؟ خير يا اابه؟.
الست سعديه: فرحك الاسبوه الجاي يا بت
نبيهه: لولولولولووللي ...
الحاج ابو نبيهه: اتلمي يا بت لا اديكي قلمين على سداغك
الست سعديه: الله يا حاج سيب البت تفرح
تدخل البت بتعه ....
الست سعديه: انتِ لسه ؟ انا مش قلت لك تغوري من هنا
نبيهه: خلاص ياامه المسامح كريم
الحاج ابونبيهه: بوسي على ايد ستك يابت
بتعه تبوس ايد الست سعديه
سامحيني يا ستي: انا اصلي خفت اتكلم قدامهم.. انت ما تعرفيش الست فكيهه ممكن تعمل ايه؟
الحاج ابو نبيهه : وفكيهه مالها ومالك؟..
الست سعديه: ما مملهاش .. روح انت ياحاج شوف شغلك...
الحاج ابو نبيهه: عندك حق انا سيب المحل يضرب يقلب.. سلام عليكو
الست سعديه ونبيهه: وعليكو السلام ورحمة الله وبركاته.....
يتبع
