الأحد، يناير 22، 2012
خالتي فكيهه الاخيرة
 
صفية  تنزل عند فكيهه
 
فكيهه: تعالي ياصفية

صفية: اصباح الخير  ياخاله..هاا   لقيتي  فكرة ترجعي بيها نبيهه

فكيهه: لسه يا صفية .. المهم قوليلي.. هيه اتصلت بيكي ولا  لا

صفيه: ولا عبرتني

فكيهه: مش قولت لك .. البت خلاص بقت بتستعر  مننا

صفية: وتستعر ليه يا خالتي .. هي فاكرة  نفسها بقت ايه؟ ولا يعني اكمنها بترطن كلمتين من  فرنساوي.. بكره  اخش اجدعها معهد
فكيهه: فسرناوي ايه  وبتاع ايه يا منيلة انت؟
صفية: الله ..  ايه لازمة الشتيمة دي بقى
فكيهه: يا بت انا اللي محيرني ايه اللي غيرها كده؟  
صفيه:  ما تيجي نطب عليها دلوقت
فكيهه:  مش ممكن.. بعد  اللي عملته معايا.. مستحيل

صفية: قلبك ابيض  وبعدين.. مش انت عايزة تعرفي ايه اللي غيرها .. حتعرفي ازاي وانت قاعدة هنا

فكييهه: عندك حق ..يلا  بينا.. وامك؟

صفية: امي  راحت السوق وحتتأخر

 تروح فكيهه وصفية عند فكيهه

الجرس يرن

الشغاله تفتح

فكيهه: سلام عليكو.. ستك هنا

الشغالة: مين حضرتك

فكيهه: قوليلها خالتك فكيهه

الشغالة": واخد اسمه فكيهاني

فكيهه: ستك فكيهه يا قليلة الرباية

الشغالة: ما يصخش كده.. مدام

فكيهه: اوعي  من وشي

سالخير يا نبيهه .. ازيك ؟ وحشاااني مووت.. ولو اني زعلانه منك

نبيهه: اهلا يا تانت.. اتفضلي ..

صفية: وانا بلاش يعني

نبيهه: اتفضلي  يا صافي .. اهلا وسهلا

تشربوا ايه؟
فكيهه: احنا مش جايين نضايف. انا  بس عايزة اعرف انت ايه اللي جرالك

نبيهه: مش فاهمة ؟. حضرتك تقصدي ايه

فكيهه: بت انتِ  حتجننيني.. ايه اللي قلب كيانك كده

نبيهه: اااه.. حبيب قلبي وائل

(صفية: حبيبك برص وعشره  خرص)

نبيهه: بتقولي حاجة يا صفية

صفيه: بقول ربنا يديمها محبة

نبيهه: اه .. على  فكرة انا موش ناسياكي .. كل يوم بفكر روح قلبي وائل

صفية: ان شالله يخليكي
فكيهه: خليكي معايا انا وقوليلي.. عمل معاكي ايه؟. وياترى انت  عملتي زي ما قولت لك ولا  لأ؟

فكيهه:  ما تخافيش .. انا عملت كل اللي طلبتيه مني بس هو  مش عاجبه .بس فاتغيرت علشانه وهو كمان ساعدني كتير وجابلي واحده تعلميني الاتكيت


فكيهه: الايه يا؟.ما علينا وبعدين

نبيهه: خلاص بقيت زي ما انتِ شايفاني .. ناني .. ولسه

فكيهه: لسه ايه اكتر  من اللي انت فيه ؟  يعني خلاص مجهودي راح؟

نبيهه: حضرتك زعلانه ليه.. موش اللي يهمك اني ابقى مبسوطه خلاص

فكيهه: يعني انت تنبسطي وانا يتحرق دمي


نبيهه:  انتِ فعلا انسانة غريبة.. انا  رايحة النادي  ... وائل  حبيبي مستنيني هناك.. تحبو اوصلك للحارة

فكيهه: لا كتر خيرك التاكس مستنينا بره.. اتفضلي انت بالسلامة

صفيه: طب والشغل؟

نبيهه: اه ... حسأل  وائل وارد عليكي

فكيهه وصفية يمشوا  من عند نبيهه

ويرجعوا  الحاره

فكيهه بتكلم نفسها :  هوا يه اللي جرى.. وصفتك مابقتش نافعه يا صفية
دي متجربه قبل كده كتيير.. اشمعنى ما حوقتش في البت نبيهه؟

لااا  ده جوزها اللي اثر عليها... طب وانا ايش عرفني انه بدل ما يرقعها قلمين ويرجعها بيت ابوها .. حيعمل كل ده... مصيبة لا يكون حبها...بس بصراحة البت تتحب .. حلوة .. وحنينه..

صفية: بقى نبيهه حلوة وحنينه.. دي عاملة زي شيخ الغفر..

نبيهه: انت احلى طبعا .. بس برضه الحق يتقال البت نبيهه حونييينه...

صفية: ماشي ماشي..

فكيهه: يابت ما تزعليش.. ما قلنا انت احلى.. وهيه تيجي ايه جمبك

صفية: ايوه كده .. بقلك ايه ياخالتي.. بفكر اروح بكره الشركه عند سي وائل

فكيهه : عين العقل يابت.. وناوية تعملي ايه؟

صفية: حسأل عليه  واعمل اللي يقدرني  عليه ربنا

فكيهه: وطمنيني.. عارفة لو قدرتي تعملي اللي ما عرفتش انا اعمله ..ليكي عندي الحلاوة
صفيه: حتديني ايه يا خاله

فكيهه: ده انا حعلمك واودكك .. احسن ما علمت البت نبيهه.. بس على الله يطمر ؟

صفية: حيطمر ياخالة .. ده انا  اصيلة .. ويطمر فيا المعروف

 صفية وفكيهه ينزلوا من التاكس على اول الحارة

صفيه تفتح الباب  بالمفتاح تلاقي مامتها مستنياها

ام مصطفى: كنتِ فين يابت ياصفية

صفية: كنت عند خالتي فكيهه

ام مصطفى: كذابه  في اصل وشك.. انا لسه جايه من هناك والبت فتكات قالت لي انكو خرجتوا مع بعض
 رحتي فين يابت

صفية: رحنا عند نزور نبيهه ياامه

ام مصطفى: كده  من غير استأذان..؟ وكالة  من غير بواب

صفيه: سماح النوبة يا امه

ام مصطفى: انا حوريكي يا بت .. من هنا ورايح ما فيش خروج.. انا عارفة انت  بتروحي لنبيهه ليه؟: تكونيش فاكراني نايمة على وداني

صفيه: قصدك  ايه يا امه..

ام مصطفى : قصدي انت  عارفاه .. المعلم فرغلي طلب ايدك وانا وافقت

صفية: بس يا امه  ده متجوز  3 وعندي 12 عيل

ام مصطفى: انا اديت كلمة خلاص

وفعلا صفية تتخطب للمعلم فرغلي


وفي ليلة الخطوبة

فكيهه تسمع الطبل  والزمر

هو في ايه يافتكات

فتكات:  دي خطوبة وكتب كتاب صفية

فكيهه: امتى حصل الكلام ده؟ البت كانت لسه معايا  من اسبوع!

فتكات: النصيب يا ستي.. عقبالنا يارب

فكيهه: طب انا حطلع ابارك

فكيهه تطلع شقة الست ام مصطفى

نبيويه تفتح:

اهلا يا ست فكيهه ..

الست ام مصطفى: استني يا نبوية... عايزة ايه ياست انت؟.؟  ايه اللي جابك ياجلابة المصايب

فكيهه: انا جلابت المصايب .. الله يسامحك .. دي جزاتي اللي جايه ابارك واهني..

من غير ما تعزميني..

ام مصطفى: الله يبارك فيكي .. متشكرين..  وتقفل  الست ام مصطفى الباب  في وش فكيهه

فكيهه: انا تقفلي الباب في وشي  ياولية ياقراشانه؟

ام مصطفى: انا  قرشانه ياحربايه ..  يا خرابة  البيوت العمرانه


فكيهه  واقفة في السلم

تخرج الست سعديه : هو في ايه يا ام مصطفى:. ما يصحش كده الليله كتب كتاب بنتك

ام مصطفى: مش شايفاها بتقول ايه.. مش مكفيه اللي  عملته ..

الست سعديه: هيه عملت ايه بس؟
ام مصطفى : انت اصلك قلبك ابيض. دي كانت ناوية تخرب بيت نبيهه بتك ..

الست سعديه: نعم.. وتخرب بيت نبيهه ليه؟. الوليه الشرانيه دي؟

الست ام مصطفى: اقولك ايه بس.. قال ايه عشان تردلك اللي عملتيه فيها زمان..

الست سعديه:واناعملت ايه ؟

الست ام مصطفى: استغفر الله العظيم يارب.. قال ايه انت خطفتي جوزها  منها..

الست سعديه: ايه ايه؟ هي الست دي هبلة ولا بتستهبل؟ 

الست سعديه  تنزل لفكيهه:


بقى انا خطفت جوزك ؟؟  يا ام اربعه واربعين يا وش النحس

الست سعديه: انا  وشي نحس.. يا .....

فكيهه: لمي نفسك .. ياسعديه لا احسن اوريكي شغلك

وتقوم عركة بين سعديه فكيهه .. وتضرب فكيهه من نسوان الحارة اللي يقفوا جمب سعديه

يوصل الخبر لهنداوي جوز فكيهه 

يسيب  شغله ويرجع البيت يلاقي فكيهه واخدة العلقه التمام

فكيهه: شفت اللي جرالي ياسي هنداوي ؟

المعلم هنداوي: مش مكسوفة من نفسك ياوليه يا ناقصة!

فكيهه  مرعوبة: هو انا عملت ايه ياسي هنداوي

المعلم هنداوي: استعبطي يا ختي استعبطي!! بقى عينك من الحاج محمود جوز الست سعدية.
نبيهه:انا؟؟ طب والله  
المعلم: هنداوي: مش قادرة تنسي انه كان عايز يهتجوزك  زمان.. يعني طول السنين دي وانا مش مالي عينك


فكيهه: لا  والله يا معلم ..ده انت  سبعي وجملي.. د ه انا من غيرك ولا حاجة يا معلم.. اوعى تصدق  كلام نسوان الحارة دول بيغيروا  مني

المعلم هنداوي: على ايه يا حسرة؟

فكيهه: كفاية اني مرات المعلم هنداوي على سن ورمح

المعلم هنداوي: بصي يا ست انت انا  .. صبرت عليكي  السنين دي كلها عشان خاطر الارض.. بس تغور الارض  اللي حتخليني اتنازل  عن كرامي.. انا حوصلك لاهلك في البلد دلوقتي   وورقتك حتوصلك ...

فكيهه: يا مصيبتي.. ابوس ايدك يا معلم.. ابوس رجلك.. انا مراتك عشرة عمرك!


المعلم  هنداوي:  هي ربع ساعه الاقيكي تحت  في العربية

ينزل  المعلم هنداوي  ووراف فتكات


فتكات: يامعلم .. ياسيدي

المعلم: ابو س ايدك .. سماح النوبة.. دي ستي فكيهه  قلبها ابيض.. وما تقصدش

المعلم هنداوي: مالكيش دعوة انتِ يا بت..


فتكات: خلاص يا معلم انا عايزة اروح مع ستي

المعلم هنداوي: غوري في ستين داهيه  معاها


يوصل المعلم هنداوي الخاله فكيهه وشغالتها فكتات للبلد....

وبعد شهرين

تجمع فكيهه  البنات اللي على وش جواز  

وتبني  في الارض  جمعيه صغيرة.. تسميها 

جمعيه  فكيهه  لكل البنات.. للي عايزة تعيش في تبات ونبات.................

تمت...

20\يناير \2012




























                        
posted by شهووووده @ 22.1.12   0 comments
 
About Me


الأسم: شهووووده
المكان: صنعاء, Yemen
عني: شهووودة .. الشهيرة بتيته شهد ( كي جي 1)
See my complete profile

Previous Post
Archives
 

 

 

..عداد الزوار.. 

free hit counter