للصبر حدود
في يوم خميس من الخميسات سافرت القطة اللي كانت عندي في البيت
وبما اني مجنونة قطط
فكان يوم كئيب بالنسبالي
اخت القطة دي فضلت معايا في البيت
جابوهالي علشان تلعب مع اختها
بدل ما هي هادية كده وقاعدة زي البرنسيسة وفعلا هما الاثنين كانوا مبسوطين مع بعض وهاتك يا لعب وتنطيط غير الغرض التاني قال ايه ترفع روحي المعنوية لما اختها تسيبني وتسافر
ما هو انا اصلي موعودة
كل ما اجيب قطة يا تضيع يا تسافر؟؟!!
حفتحها حضانة قطط باين!!
وطبعا بما انها جتلي كبيرة ومش متعودة على بني البشر
فكان صعب اني ادلعها واهشتكها زي اختها
القطة دي اتعلقت بأختها جدااا
ولحاد النهاردة حزينة حزن عمري ما شفت كده في حياتي
القططية !!
-فعلا قطة اصيلة
فضلت مضربة عن الأكل يومين تقريبا
ولحظة ما يقرصها الجوع وتاكل لقمتين بالعافية .. تـئن أنين ..يا سااتر.. وجعتلي قلبي ...
شوية بشوية ابتدت تلعب على خفيف
امبارح واول امبارح جتلها حالة الاكتئاب تاني!!
صوتها اختفى تماما
بعد ما كان عالي جدا...
يادوب تاكل وترجع تنام
واول ما تشوفني تجري
زي ماتكون بتقلي مش عايزة اشوف وشك انتِ اللي خدتي مني اختي !!
طب وانا مالي ؟
يا بنتي اختك اساسا مش بتاعتي
دي كانت امانة عندي وبس
وبعدين صاحبتها عايزها تسافر
وجابتلها الفيزا
اقف انا في وشها واضيعلها مستقبلها !؟
ولعلمك هيه اساسا مش جايبة خبرك؟؟
وقاعدة هناك اخر انبساط
هو انت نسيتي لما كنت بتندهي عليها وكانت بتطنشك
هو اي نعم ساعات كانت بتاخدك في حضنها
بس خلاص هيه سافرت وده نصيبها المفروض تفرحيلها
مش تنكدي عليا عيشيتي
وقال على رأي المثل
اختين وليهم بختين...
بلاش الحساسية الزايدة دي
بكرة يا ستي تجيلك انت كمان فيزة للسعودية وتزوريها ولو اني اشك انها حتفتكرك اصلا! اصلها بجد..بجد.. مش اصيلة زيك...
وبعيدن تعالي هنا
لمابتصحى الفجر من النوم
بتقفي قدام باب اوضتي ليه؟؟
مياااوو
مياااوو
جيعانة؟!
ياسلااام يا ختي ؟؟!!
وقت ما تجوعي تجيلي
ولا كأن في حاجة
واول ما احطلك الأكل
تبصيلي شزرا ( الاهو يعني ايه شذرا وهيه بالذون ولا بالزون؟)
وتاكلي ..ولما اقربلك تجري ..
كأنك شفتي عفريت قدامك
ماشي يا ستي
انا فرقت بينك وبين اختك
ودمرت علاقه اسرية قططية
بتجري ورايا لما تجوعي ليه؟!
مش انتِ مخاصماني
واللي بيخاصم حد
ما بياخدش منه أي حاجة
ما تخلي عندك كرامة ؟!
بس تعرفي بالرغم من كل ده
عاجباني قوي حتة الإخلاص اللي فيكي دي..
وده اللي مخليني استحمل عمايلك الغبرة فيا
بس لازم تعرفي
انما للصبر حدود
للصبر حدووود
للصبر حدوووود
ياااا قطتي....
|
