اللي ما ربهوش ابوه وامه تربيه القطة
ابن اخويا وابن اخوتي المفاعيص.. عارفين اني بموت في القطط
لقوا قطة متشردة بس جميلة في الشارع من غير بابي ولا مامي ياحرام ..
جابوهالي وهما اخر انبساط ..
الواد ابن اختي بيخبط عليا الباب عايز يصحيني من احلاها نومة .. وانا ولا معبره
اول ما صحيت جري عليا ..
تعالي شوفي جبتلك قطة
يا عيني كانت تعباانة ومهدود حيلها يا كبدي
خدتها حميتها بفرشة السنان ( مش فرشة السنان بتاعي !!)ونشفتها بالمشوار
اول يوم نامت معايا في اوضتي .. وعينك ماتشوف الا النور
مياااااااو.. مياااااااو ..
نامت شوية
ويادوب لسه حروح في النوم
مياااااااااااااااااااااو
صحتني تقريبا 3ونص .. اربعه الفجر
قررت بعد كده انيمها في الأوضة اللي فوق
لقيت نفسي بطلع وراها كل شوية
امي قالت لي.. كنت بتكسلي تطلعي فوق
دلوقتي القطة بتطلعك كل شوية!!
اللي ماربهوش ابوه وامه.. تربيه القطة
امبارح وانا في الشغل .. اختي ادتها جبنة .. ما رضيتش تاكلها .. مع انها بتاكل جبنة عادي زي أي قطه
لما جيت قالت لي قطتك جعانة طلعت المطبخ ..عشان اديهاحاجة
تاكلها مع ان الطبق بتاعها كان مليان قبل ما اروح الشغل وهيه عادة ما بتاكلش كتير
يلا معلش يمكن ابتدت تكبر وعايزة تاكل اكثر
رحت مطلعه حتة فرخة من حلة الملوخية وغسلتها وقطعتها واديتهالها
قعدت تشم فيها ومارضيتش تاكلها
مش عارفة تكنش عايزة كنتاكي ولا شاورما بالطحينة
طيب يا ستي .. خدي كلي الجبنة
راحت واكلة الجبنة؟؟!!!!!!!
ما كان من الأول ..
|
