طفولة شهـــــــد: نبيهه النبيهه وخالتي فكيهه12

المكان: قدام بوابة المستشفى

المنظر: نبيهه داخلة بزعابيبها ..

الحوار: انت يا ست سيئات .. انت يا زفته ...

مديرة المستشفى: في ايه مين اللي عامل الدوشة دي ؟؟

نبيهه: انا يا ست المديرة.. مش انت الست المديرة برضك ولا خيال مآته؟؟
مديرة المستشفى: احترمي نفسك احنا في مستشفى محترمه

نبيهه: محترمه لا والله ما هو باين اهو؟؟

حسنات: مين اللي بينده عليا ؟؟؟

نبيهه: بركه انك عرفه اسمك بقى انتِ حسنات انتِ ؟؟

حسنات: ااااه حسنات عصبات عن اللي خلفوك يا بوز الأخص..

نبيهه: انا بوز الأخص يا امنا الغولة!!

حسنات : انا ............

مديرة المستشفى : بــــس

حسنات : عاجبك كده يا ست الريسة ما عملتلهاش ايتوها حاجة ونازلة فيا بهدلة اهئ.. اهئ.. اهئ

نبيهه: ياولية يا قرشانه .. انا اللي نازلة فيكي بهدلة ولاانت اللي رميتي امي الغلبانة في الشارع... بقى دي عملة تعمليها ولا اكمنها ست عجوزة ومش حتتقدر عليكي يا اتوبيس من غير فرامل ...

حسنات: لألألألألأ لمي روحك شوية اااااااااه ده انا حسنات والأجر على الله وبعدين انا عبد المأمور روحي اسألي الست الريسة..

نبيهه تبص للريسة بنظرة غل ....

الريسة: ايييه وانا مالي يا ختي .. هيه الست اللي جابتها معاها قعدت تزعق وتقول

الحقوووني الست دي بتهددني .. حتموتني .. وابصر ايه ومش عارف ايه ... فندهنا على حسنات تشيلها هيلة بيلا عشان استتباب الإمن في المستشفى

نبيهه: امن ايه اللي بتكلمي عليه ده دي حتة مستشفى جربانه معفنة

الريسة: لألألألأ احترمي نفسك واحفظي ادبك يا ست انت

حسنات: ارميها بره يا ست الريسة

نبيهه: ترمي مين يا بوز الأخص انت؟ وبعدين انت ايه اللي جابك هنا .؟
بقى دي مناظر تتحط في مستشفى!!

حسنات: وبعدين بقــــى في قلة الأدب ديييي

الريسة: سيبك منها انتِ يا حسنات وخلينا نروح نشوف شغلنا

نبيهه: هو ده اللي قدرتي عليه .. بدل ما تديها بالصرمة القديمة على دماغها

حسنات : بقلك ايه غوري من وشي الساعه دي.. ما تخلينش افرمك تحت رجليا ...

حسنات والريسة يسبوا نبيهه عماله تهاتي...

نبيهه : تفرمي مين ؟؟؟ تعالي هنا ؟؟؟ انتوا رايحين فين وسايبني يا وليه انتِ وهيه؟؟ طييب

نبيهه تلف على العنابر واحد واحد لحاد ما تلاقي فكيهه قاعدة وحواليها الممرضات ...

نبيهه: انت هنا وانا عماله ادور عليكي ؟؟؟

فكيهه : ميين نبيهه عروستنا الحلوة تعالي جمبي تعاااالي

نبيهه: بقى دي عمايل تعمليها في امي يا خالتي فكيهه

فكيهه: ماهيه اللي معطلاني عن اداء مهمتي الرسمية( مش هم بيقولها كده برضه يا بت يانورا؟؟)

نورا: ايوة يا خالتو فكيهه

نبيهه: والله وبقيتي بتكلمي بالنحوي يا خالة فكيهه الله يرحم...

فكيهه: ايوة يا بت يا نبيهه.. ما هو اصل .. تعالي بس اما اعرفك عـلى الأماير دول ماهم عرايس زيك يا عين خالتك

نبيهه: ما تخدينيش في دوكة وتنسيني اللي انا جاية عشانه

فكيهه: وانت جايه ليه يعني.. مش عشان تطمني على خالتك فكيهه العيانة

نبيهه: لا طبعا وبعدين ما انت زي القرد اهو

فكيهه: قرد في عينك بت قليلة الرباية صحيح

نبيهه : انا جاية اخد حق امي ياولية يا مفتريه .. تعاليلي هنا

فكيهه: طب قربي بس وشوفي الي حيجرالك .. انا وريا نسوان تاكل الزلط

يا بهاااااااااااااااااااااااااااااانة ..

ست ابوهاااا

كتفوا البت دي خلونا نعرف نتكلم
بهانة وست ابوها : حاضر ياخاله فكييهه

ويمسكوا نبيهه ويكتفوها

نبيهه: بقى كده ياخالة فكيهه .. ده انا نبيهه حبيبتك وزي بنتك

فكيهه: لا ياشيخه دلوقتي مش فاكرة عملتك السودة فيا انا وخالتك عطيات .. مرة من نفسي ..

نبيهه: ما انتِ رديتهالي وخليتي امي ترنني علقة ما خدهاش صبي في مولد.. وبهدلتي أمي ومسحتي بكرامتها الأرض..

فكيهه: امك دي وليه هبلة .. وانتِ هبلة وعبيطه زيها مش عارفين مصلحتكوا فين..

نبيهه: ياسلام وانت اللي حتعرفينا مصلحتنا؟؟؟

فكيهه: ايوه ولا نا مش ماليه عينك ؟؟

نبيهه تبص لخالتي فكيهه نظرة حقد وكره...

فكيهه: ما تبصليش كده واترزعي هنا.. لحسن حديكي بالبلغه واخليكي تروحي لعريسك بعاهه مستديمة يرجعك لأبوكي وامك..

نبيهه: يرجع مين ياخالة هو يطول اصلا ده انا نبوهه.. جمال ايه واخلاق ايه وادب ايه ورقة ايه

فكيهه: بأمارة الهبل اللي بتتعلمية من امك ؟؟

نبيهه: سيبي امي في حالها يا خالة يووووة بقى

فكيهه: طب تعالي يا ست ابوها انت وبهانة وانا راضيه زمتكوا ..

ست ابوها : نعم يا حاجة

بهانه: ايوة يا خالة
.

فكيهه: بقى في ست عاقلة في الدنيا لما جوزها يوصل البيت شايل ومحمل تقابلة بابتسامة وتشيل الحاجة من ايده وتقله تسلم ايدك يا سبعي .. وتجهزله الحمام السخن وتجهزله الغدا وكمااان متقيفة ولابسه على سنجة عشرا؟؟

بهانه: ده ايه العبط ده ياخالة

ست ابوها : ايه الولية الهبلة دي؟ ده كده جوزها يقعد على دماغها ويدلدل رجلية كمان ..

فكيهه: شفتي يا عبيطة ان امك حتوديكي في داهيه .. اسمعي كلامي بس وانت تفلحي...

نبيهه: طب وحق امي .. اللي بهدلتيها

فكيهه: يييه.. يا دي امي امي اللي انت هرياني بيها .. مالكيش دعوة انا اول ما اطلع من هنا حروح ابوس على راسها واستسمحها..

نبيهه: بجد يا خالة؟؟؟

فكيهه: اه امال انت فاكرة ايه احنا مالناش غير بعض

نبيهه: طب قوليهم يفكوني ...

فكيهه: ليه يعني؟؟

نبيهه: عشان ابوس راسك واستسمحك انا كمان...

فكيهه مزبهلة ؟؟ معقولة دي ؟؟ ده ايه العقل اللي نزل عليكي مرة واحده ؟؟
فكيها يا بت يا سعاد

نبيهه تجري على خالة فكيهه تمسكها من رقبتها وتبوس راسها جااااامد

فكيهه: بس بس كفاية .. خلاص .. خلااااص .. اقعدي بقى خلينا نعرف نتكلم قبل ما اللي الولية المسلوعه تعدي على العنابر مع امنا الغولة اللي اسمها حسنااات

الباب يتفتح ... تحش حسنات....

حسنات: ايييييه في حد بينده عليا.....

يتبع...