المكان: شقة خالتي عدلات
الأشخاص : فكيهه, نبيهه’ عدلات’ نعيمة الشغالة
المنظر: عدلات وفكيهه قاعدين في الأرض مربوطين بحبل, نبيهه بتشرب كباية الشاي ,
نعيمة الشغالة قاعدة في الأرض جمب الكرسي اللي قاعدة فيه نبيهه.
الحوار: نبيهه: مش سامعه الباب بيخبط يا مضروبة قومي افتحي..
نعيمة الشغالة: ايوة ياست نبيهه بسسسسسس ..
نبيهه: ما تبسبسيش .. قولي مين قبل ما تفتحي.
نعيمه : حاضر
نعيمة تقوم تفتح الباب..
ايوة مين اللي بيخبط
بهيه: اناااا
نعيمة: ايوة مين يعني ؟؟
بهيه: انا بهييه يا بت مالك مش عارفة صوتي ؟؟
نعيمة تفتح الباب بالراااحه وبصوت واطيي: يخرب بيتك ايه اللي جابك دلوقتي ؟؟ امشيي
بهيه: في ايه يا نعيمة.. بقى دي مقابلة تقابليني بيها؟؟
نعيمة: تلطم على وشها:.. امشي دلوقتي الله لا يسيئك.
بهيه: ايه يا بت امشي ليه .. هو احنا بنسرق.. انا جاية ازورك .. وعندي ليكي اخبار من الواااد عويضة
نعيمة: ياختي ان شا لله تسلمي بس امشي دلوقتي
وانا حبقى اكلمك بعدين .. يلااااااااااا
بهيه: طيب طيب .. بس ما تزقيش.
نبيهه: مين يا نعيمة ؟؟
نعيمة: مافيش ده الزبال يا ستي.. خلاص مشيته
بهييه واقفة تتصنت ـ عـ الباب
بقى انا الزبال!! يا معفنه يا جربانة.. مااااشي
نبيهه: خلاص اترزعي هنا
نعيمة : حاضر يا ست نبيهه
عدلات: هو احنا مش حنخلص مـ الربطه السودة دي
فكيهه: والله ما انا عارفة يا عدلات يا ختي !! كان يوم اغبر يوم ما جبت البت دي
نبيهه: في ايه يا خالة عدلات عايزة حاجة؟؟
فكيهه: لا موش عايزة حاجة .. احنا كده فل وتمام التمام.. مش كده يا عدلات؟؟
عدلات: اه طبعا ... امااال.
نبيهه: طيب : طالما كده احكي و قولي اللي عندك ياخالة عدلات انا جوازي فاضل عليه شهر .
عدلات: لو قلتلك حتشيلي الهباب اللي انتِ رابطاني بيه ده؟
نبيهه: ايوة طبعا .. هو انا ربطاكوا ليه اساسا مش عشان تهدوا كده واعرف افهم منكوا
عدلات: طب اسمعي طبعا خالتك فكيهه فطمتك حتعملي ايه ليلة الدخلة
نبيهه: ايوة البصل و التوم وزيت الخروع.....
فكيهه: شاطرة يا بت ما بنتنسيش الدرس ابداا
نبيهه: ودي تيجيي انسى كلام خالتي فكيهه على سن ورمح
فكيهه:ايييه . سن و رمح ايه هو بقى فيها سن .. ده انا بقيت فكيهه مسخـــرة
نبيهه: قطع لسان اللي يقول كده يا خالة.
فكيهه: ما انت قلتي يلا ما بدهاش , خلينا فـ موضوعنا
نبيهه: احسن برضه
عدلات: نكمل ولا ايه العبارة؟
نبيهه:قولي يا خالة عدلات .
عدلات: شوفي يانبيهه يا بنتي جوزك اوعي تعمليلة قيمه ابداااا .. تخرجي وقت ماتحبي و وترجعي وقت ما تحبي
نبيهه: طب ولما يسألني رايحه فين؟؟
فكيهه: تقوليله وانت مالك ياحشري!
عدلات: ولو شخط فيكي مثلا .. تشتميه بكل شتايم الدنيا اللي تعرفيها ..
فكيهه: وكل يوم تطلبي حاجة.. اشي دهب واشي هدوم,, واشي البتاع ده اللي اسمه موباين وكده يعني.. وفلانة جوزها جايبلها عربية اخر موديل اشمعنى انا .. وتشطبي على اللي في جيبه اول بأول..
نبيهه: طب ولو ما معاهوش؟
عدلات: ساعتها تولعي البيت حريقة, وتفضحيه وتروحي للجيران وتقوليلهم جوزي بخيل.. ده مجوعني..
ومبهدلني ......
فكيهه: وأول ما يحط اللقمة في بقه تقوليله
نبيهه: بالهنا والشفا يا حبيبي
فكيهه: حبيبي ايه حبك برص..
نبيهه: يوه يا خالة ما بلاش الكلام ده
فكيهه: با بت انا بوعيكي..
اول ما يحط اللقمة في بقه ,, تقوليله .. ان شالله تطفح .. بالسم الهاري .. حار ونار في جتتك.. مطرح ما يسري يهري..
نبيهه: ياخالة .. ياخاله..ده كده يرجعني بيت ابويا عدل.. ده لو ما جابش ساطور وقطعني حتت !!!
فكيهه: يقطع مين يا بت .. يقطع خبره .. هو يستجري.. بس استحياط برضه خدي معاكي قزازة مية نار .. ولو حسيتي بأي غدر .. رشيها على وشه على طول
نبيهه: يانهار مش فايت .. دي ما بقتش جوازه .
عدلات: يا عبيطة . ما هيه الرجالة ما تجيش الا كده.. جربي انت بس ولو ما بقاش زي الخاتم في صباعك..مابقاش انا عدلات..
فكيهه: اسمعي الكلام يا بت .. حاكم خالتك عدلات دي خبره .. هو انت ما شفتيش جوزها
نبيهه: لا ما شفتوش يا خالتي
فكيهه: كان راجل ملو هدومه.. ماحدش يقدر يقله تلت التلاته كام اتجوز عدلات من هنا .. وهما شهرين!! شهرين ايه ؟؟
اسبوعين بس .. ما عادش في لسانه غير حاضر يا عدلات .. من عنيا ياعدولتي .. اطبخلك ايه يا روحي .. هاتي هدومك اغسلهالك ...
نبيهه: ياحلاوة ياولاد.. جوزك بيعمل كووول ده يا خاله عدلات!!!
عدلات: طبعا ياست العرايس اسمعي كلامنا بس وانتِ تعيشي عيشة الأمرا .
نبيهه: ماشي يا خالة حجرب!!
نبيهه تبص في الساعه.. يانهاااار مش فااايت انا اتأخرت قوي . زمان امي جت...
نبيهه تجريييي عـ الباب
فكيهه: استني يا بت استني ...حتسيبينا كده ..
عدلات: مش تشيلي الحبل اللي انت رابطانا بيه ده
نبيهه: فكيهم يا عيمة .. بســـرعه
نعيمه تفك خالة عدلات وخالة فكيهه
نبيهه: تمسك ايد خالة فكيهه وتطلع الأتوبيس .. ومواصلة ورا التانية لحاد ما توصل البيت.
نبيهه و خالتي فكيهه يوصلوا لباب العمارة
الست سعديه مامة نبيهه واقفالهم عند البوابة
نبيهه: يامصيبتيي
وتمسك في ديل خالتي فكيهه وتستخبى وراها
نبيهه: أمييي.. خبيني ياخالتي .. خبيني..
سعديه: كنتِ فين يا بت لحاد دلوقتي
نبيهه: كو ...كو ,,ككو ,,نننت
سعديه: كنتِ فين انطقي؟
تبص تلاقي فكيهه: واقفه:
سعدية:انتِ كنت ِ مع الست ديه نهارك اسوووود
فكيهه: وانا مالي يا ختي انا جاية لو حدي
نبيهه: بقى كده ياخالة؟؟
فكيهه: انا لا خالتك ولا اعرفك .. روحي شوفي بنتك بتتصرمح فين يا ست سعديه
سعديه: ما تتلمي يا وليه انتِ انا بنتي متربيه
فكيهه: طب اسأليها كده كانت فين ؟؟ ولولايا انا .. كانت الفاس وقعت فـ الراس
نبيهه: انت ِ حتتبلي عليا .. ولا ما كفتكيش العلقة اللي خدتيها
سعديه: علقة ايه دي يابت؟؟
فكيهه: اصل بنتك المتربية لما رحت الحقها واطلعها من المكان.. استغفر الله العظيم !! استغفر الله العظيم !! اللي كانت فيه ..
مسكتني ضربتني وكسرت عضمي .. اكمني ست عجوزة وعضمة كبيرة وهيه شابة وربنا مديها شوية صحه
نبيهه: ماتصدقيش الولية الخرفانة دي يا امه
فكيهه: انا وليه خرفانة .. الله يسامحك يا بنتي
سعديه ام نبيهه تشدها من شعرها انجري قدامي عـلى جوا يا بت
نبيهه: يا امه دي كدابة .. كدااااابه
سعديه: اخرسي يا قليلة الرباية انا حعرف اربيكي من اول وجديد....
نبيهه:يا امه اسمعيني بس
فكيهه تدخل شقتها وتتصل بعدلات وتقولها لو ام نبيهه اتصلت قوليليها انها ما جاتلكيش خاااالص
فكيهه تطلع من شقتها وتخبط عـلى باب شقة نبيهه ..
فكيهه :على مهلك يا ست سعديه .. دي البت لسه صغيرة .. كله بالهداااوة .. بالهدااوة
نبيهه: كله منك ياوليه يا قرشانة ..
ياامه والله كنت معاها عند خالتي عدلات حتى كلميها واسأليها
فكيهه: ايووووة كلميها وادي النمرة اهيه
سعديه : حكلمها واللي تطلع فيكو كدابة يا ويلها يا سواد ليلها
سعديه: الووو .. ممكن اكلم الست عدلات
عدلات: ايوة معاكي
انا سعديه ام نبيهه: الا قوليلي نبيهه بنتِ جتلك النهاردة؟
عدلات: نبيهه ؟؟ لا ما شوفتهاش خالص
سعديه تبص لنبيها بنرفزة وعصبيه ..
نبيهه: في ايه يا امه.. خالة عدلات قالت لك ايه؟؟
عفاريت الدنيا تتنطط في وش سعديه .. تزق فكيهه لبره وتقفل الباب وو.......
يتبع..... |
