المكان: مستشفى
الأشخاص: خالتي فكيهه, الست سعدية, الدكتورة جارتهم
المنظر:
الست سعدية والدكتورة جارتهم ساندين فكيهه وداخلين المستشفى
الدكتورة جارتهم توصي الدكتورة المناوبة زميلتها على فكيهه وتستأذن
الحوار
الدكتورة المناوبة:مالك ياحاجة الف سلامه؟؟
فكيهه: اه يا ضهري يانييييي..
اه يا بطنيييي ااااااه
ااااه يادمااااااغي ..
اااييي يالوزيييي
اه يا مرارتي اللي اتفقعت يااااااني
اااااااه ياكل حتة في جسميييي
الدكتورة: طب.. أهدي كده .. وأول ما اجي على حتة بتوجعك قولي اه بس بالراحة.. ماشي
فكيهه: مااااااشي يا دكتورة.
الدكتورة يادوب لسه حتحط ايدها على فكيهه
فكيهه: اااااااي
الدكتورة بالهداوة أ نا لسه ماعملتش حاجة ؟؟
فكيهه: بتشخطي فيااااااا انا عايزة دكتورة تاااااانية ؟؟
الممرضة : مافيش دكتورة تانية ولو مش عاجبك المستشفيات على قفا مين يشيل
الست سعديه: اختشي على دمك يا فكيهه !! مش كفاية الدكتورة سايبة العيانين بتوعها وبتكشف عليكي
الدكتورة: معلش يا حاجة .. معلش ؟؟ ده شغلي.
فكيهه: وانتِ ايش اخششك بينا يا حشريه ؟؟ ؟؟ ايه اللي جابك هنا اساسا ؟؟ جااية تشمتي فيا
مشوا الوليه دي من هنااااا؟؟
سعديه: صحيح خير تعمل شر تلقى!!
انا ماشية يا دكتورة .. فتكوا بعافيه؟؟
فكيهه: امال مين اللي حيدفع الحساب؟؟
يا سعدية ... يا سعديييه
ادفعي الحساب طيب وغوري في داهيه .
سعديه داهية ما ترجعك.. أما انتِ وليه ناقصة بصحيح؟؟ انا اللي استااااااهل
سعدية تخطي اول خطوة
فكيهه تمسك في ديل جلابيتها!!
فكيهه:اهئ اهئ ..اهئ .. بقى كده يا سعدودتي ؟؟ تسييني ويا الجزارين يقطعوا فيا !!!!!
الممرضة : جزارين!! جزارين ايه يا ست انتِ ! دي مستشفى موش سلخانة
الدكتورة : ششششششششش ولا كلمة سيبيها تقول اللي هيا عايزاه
الممرضة: بس يا دكتورة دي ست قليلة الأدب
الدكتورة: انا قلت ولا كلمة اتفضلي اعمليلها التحاليل والاشعه دي بسرعه
الممرضه مكشرة : امرك يا دكتورة
سعدية : انا رايحة ادفع الفواتير يا دكتورة
فكيهه: محاليل ايه دي ؟؟ سعدية ما تسبينيش يا سعديه؟؟
الممرضة تاخد فكيهه على معمل التحاليل
فكيهه:ايه ده ؟؟ حقن !! لا يا ستي مش بحب الحقن
الممرضة: هاتي دراعك وخلصيني ..
يا حسنات ؟؟ يا حسنات .. تعالي امسكي ايد الست دي عايزين نخلص
فكيهه: بقى دي حسنات.؟؟ دي سيئاااات
حسنات: تمسك دراع فكيهه ..فكيهه ماتعرفش تفلفص منها
فكيهه: دميييي؟؟ بتشفطي دمي يا مفترييه... اييي
الممرضة: ما تخرسييي يا وليه
حسنات تكتم بق فكيهه والممرضة تخلص بقية التحاليل
الممرضة: تاخد فكيهه اوضة الأشعه
فكيهه: تصوت وتقلب المستشفى
حتودوني على فين تاااني؟؟ يا مجرمين؟؟ يا جزارين!! مش كفاية شفطتوا دميي
اااه يادمي يااااني ......
صويت فكيهه يوصل لمكتب رئيسة القسم في المستشفى!!!
رئيسة القسم المستشفى:ترفع السماعه وتكلم الدكتورة المناوبة
الو يا دكتورة هو في ايه؟؟ ايه الدوشة دي ؟؟
الدكتورة : ابدا يا دكتورة مافيش حاجة ’ ما تقلقيش حضرتك
الدكتورة رئيسة القسم المستشفى: ما اقلقش ازاي ؟؟ انا جاية بنفسي اشوف فيه ايه؟؟
الدكتورة: يادكتورة ما تتعبيش نفسك اناااااا..
تقفل السكة
الو.... الو... الووو..... ربنا يستر
الدكتورة توصل اوضة الاشعه قبل رئيسة القسم تلاقي فكيهه عمالة تتنطط فوق الأجهزة
والممرضة تجري وارها هيه وحسنات (مسؤلة النظافة في المستشفى ) عشان يمسكوها
الدكتورة: ايه ده ؟ ايه اللي بيحصل هنا؟؟
وانت ايه اللي جابك هنا؟؟ انا مش قلت لك مالكيش دعوة بالعيانين؟؟ اتفضلي شوفي شغلك
وحسابي معاكي بعدين
حسنات تفتح الباب تلاقي رئيسة القسم في وشها ..
تخبط فيها توقعلها النظارة
حسنات بصوتها الخشن: حقك عليا يا دكتوورة ما خدتش بالي
الدكتورة رئيسة القسم : وانت حتاخدي بالك ازاي ؟؟ما احنا بالنسبالك كائنات صغيرة لاترى بالعين المجرده !!
هي مامتك رضعتك ايه وانت نونة؟؟ ولاتلاقيكي اتولدت كده!
حسنات : الله هو ايه اصله ده يا دكتورة ؟؟ ما تخليكي حلوة اماااال؟؟
الدكتورة رئيسة القسم: انتِ بتردي عليا ؟؟ طييب ؟؟ ان ما وريتك ؟؟ مخصوم منك شهر ونص
حسنات تقف قدام الدكتورة رافعه راسها ومكشرة وحاطة ايديها في وسطها
ليه بس كده يا دكتورة .. ما بلاش افترى ؟؟ هو انا كنت عملت لك ايه يعني ؟؟
الدكتورة رئيسة القسم: ما تناقشنيش؟؟ امشي غوري من هنا؟؟ انتِ مرفودة
حسنات: منك لله يا مفتريه.؟ بس صبرك عليا لما نخرج من المستشفى؟؟ ا ن ما عملت عضامك فتة كوارع
الدكتورة رئيسة القسم: بتهدديني ؟؟ اندهولي الأمن ؟؟ فين الأمن؟؟
الدكتورة المناوبة: حقك عليا يا دكتورة .. امسحيها فيا انا حسنات ما تقصدش؟؟
امشي يا حسنات امشييي
حسنات بصوتها الخشن : انا ماشية اهو الله ؟؟ عشان خاطرك انت بس ؟؟
رئيسة قسم: حاجة تقرف .. ومين الست اللي بتنطط دي ؟؟ احنا في مستشفى ولا ف جبلاية القرود؟
فكيهه: تنظ من عـ السرير وتقف في وش رئيسة القسم ؟؟
جبلايه مين يا ختيييي؟؟ اهو انت واللي يتشدللك..
يا معصعصة يا مسلووووعه
الدكتورة المناوبة: عيب كده يا ست فكيهه ما يصحش
رئيسة قسم: هو ده اللي قدرتي عليه ؟؟ عيب كده يا ست فكيهه؟؟
الدكتورة: امال اعمل ايه يا فندم؟؟
رئيسة قسم: تطلبي أمن المستشفى والتمرجيه ؟؟ مش شايفة عملت فيا ايه؟؟
الدكتورة المناوبة : معلش حقك عليا انا يا دكتورة دي ست كبيرة وعيانة قوي معلش ؟؟
الدكتورة رئيسة القسم: بقى دي عيانة دي ؟؟ امال لو كانت كويسة كانت عملت ايه؟؟
فكيهه: الله اكبر !! الله اكبر!! خمسة في عين اللي ما يصلي ع النبي تف تف تف تففففففففففف
الدكتورة: اللهم صلي على النبي .. اهدي يا مدام ارجوكي خلينا نعرف نعملك الاشعه ونشوف اللي عندك ده من ايه؟؟
سعديه تخبط عـ الباب
في ايه مالك يا فكيهه ؟؟ نهااارك اغبر ايه اللي انتِ هببتيه ده؟؟
فكيهه: بيضربوني يا سعدية يخييي....
الست المسلوعه ام نظارة قعر الكباية دي بهدلتني وشتمتني؟؟ وضربتني بالجزمة المعفنة على وشييييي
ايييي...
رئيسة القسم: انا ؟؟ انا ضربتك وشتمتك يا مدام ؟؟
فكيهه: ايوة .. حتنكري يعني؟؟ ولا اكمنك الست الدكتورة رئيسة قسم ؟؟ وانا ست غلبانه
ومنكسرة
سعديه: بقى الست الأميرة دي تضربك انت ؟؟ وانتِ ياست الدكتورة سايباها تعمل كل ده فيكي و ساكته؟؟
الدكتورة رئيسة القسم: امال اعمل ايه بس ؟؟ دي في مقام والدتي؟؟
سعديه : في مقام والدتك ..و الله انتِ ست محترمة ؟ وعلى نياتك؟؟ انا لو مكانك .. ارقعها قلمين على سداغها اعرفها ان الله حق؟؟
فكيهه: ودي مين دي اللي ترقعني قلمين يا ؟؟ اخص عليكي يا سعديه اخصصصصص لكن معلهش مانت مستقصادني
سعديه: ومسقتصداكي ليه إن شاء الله ؟؟ من جمال سحنتك يعني؟؟
فكيهه : ايوة طبعا بأمارة ماكنتِ واقعه لشوشتك في سي هنداوي جوزي وهو اداكي الطرشة واتجوزني أكمني احلى منك؟
سعديه: هنداوي مين ده اللي ابصله !! بلا خيييييييية؟؟ ده ضافر سي الحاج عبد العظيم برقبة اللي ما يتسمى جوزك ؟؟
فكيهه: اسمه هنداااوي بسطويسي عبد العال هندااااوي
سعديه بسخريه: عاشت الاسامي يختي !!! اوعي من وشي كده خليني اعرف اكلم الست الدكتورة.بقلك ايه يا ست الدكتورة
الدكتورة: نعم يا سعدية هانم
سعدية: هانم ؟؟؟ ان شا الله تسلمي ياختي .. شايفة الناس المحترمة ؟؟
فكيهه: ضحكتيني ؟؟ فرحانة قوي ؟؟ معلش اصلها مش واخده عـ العز ؟؟
سعديه: احترمي نفسك واتلمي يافكيهه ؟؟
فكيهه: واتلم ليه يا ختي ؟ شايفاني مبعترة!!
الدكتورة رئيسة القسم : بــس يا ست انتِ وهيا احنا هنا في مستشفى ؟؟ عايزين تتخانقوا اطلعوا بره؟؟
سعديه: معلش يا ست الدكتورة حقك عليا انا ؟؟ سامحيني ؟؟ هاتي راسك ابوسها
رئيسة القسم: خلاص خلاص؟؟ ما جراش حاجة يا سعدية هانم
سعديه مبسوطة قوي من كلمة هانم:
فكيهه: انت حتفضلوا تجاملوا فـ بعض وسايبني وجسمي كله بينقح عليا؟؟
اااااه ياااااني يا كعوب رجليا؟؟
يا مصارينيي..
نااار بتولع في جتتي
الدكتورة المناوبة: ما حضرتك مش عايزانا نعملك التحاليل والاشعه يا مدام فكيهه؟
فكيهه: ماشي ياست الدكتورة ؟؟ بس بشرط مش عايزة الست الممرضة اللي عاملة زي السيد قشطة دي تعملي التحاليل ؟؟ اعمليهاالي انت ؟؟
الدكتورةالمناوبة: بس يافكيهه هانم ده شغلها هيه ؟؟
فكيهه: خلاص مش حعمل أي حاجة ؟؟ يلا يا سعديه نروح مستشفى تانية
سعديه: يا فكيهه بلاش دلع ؟؟ هو في مستشفى حتستحمل عمايلك دي ؟؟ اسمعي الكلام ؟؟
فكيهه: لااا يمكن الست دي تقرب مني ؟؟ لايمكن
الدكتورة المناوبة : طيب يا فكيهه هانم انا حجيبلك ممرضة تانية ولا يهمك اهدي انتِ بس.
فكيهه: ان شا الله يخليكي يا اميرة يا بنت الأمرا؟؟
الدكتورة المناوبة: الو ؟؟ انسة نورا من فضلك تعاليلي حالا
الممرضة نورا: حاضر يا دكتورة
الممرضة نورا : تدخل ببتسامة هادية وجميلة تحت امرك يا دكتورة
يتبع....... |
At 07 سبتمبر, 2010 05:27 م, غير معرف said…
بجد جميله مع دوام التفوق والتقدم بس لي ملحوظة
يا اختنا الفاضله قرات عنك انك اسمك شهوده من صعناء باليمن
وانا بجد احب اهل اليمن لان الرسول قال ان الايمان يماني واشار ناحيه اهل اليمن
اما ملاحظتي
انا وانا اقراء ما كتبتيه تيقنت من مصريتك وانك مصريه حتى النخاع
اللهجة العامية المصريه
انا تخيلتني في مستشفى مركزي بمنطقه شعبية والست نبيهه وفكيهه دول من مصر القديمة
من المدبح
من باب الشعريه
حاجه كده
سؤالي
كيف تمكنتي من اللهجه المصريه العاميه ممكن اعرف
ام انك مصريه يمنيه
اخيك
جمال ابراهيم
المحامي
مصري قاهري