اميبا في بيتي الأخيرة
المكان : في الطريق الى الأمعاء الدقيقة
المنظر: الأنتاميبا اللي كانت هربانة مربوطة بحبل جوا شوال بتخبط بأديها ورجليها ..الزحرور شاددها وراه .. الأنتاميبا الأم ماشية وراهم في صمت والدمعه حتفر من عنيها..
الحوار: الأنتاميبا الأم: ما تفتحلها الرباط شوية يا اخويا ... الهي يفتحلك بطن كل بني ادم تخش في امعاءه الدقيقة تبلبط فيها زي ما يعجبك .. ولا يوقف في وشك ايد مغسولة.. ولا خضار نظيفة ...........
الزحرور: اكتمي خالص ياوليه لااقطع خبرك...
الأنتاميبا الأم: لا خلاص حكتم خالص .. اهووو...
وفي سرها( الهي يوعدك بحمة شوكيه تجيب اجلك يامفتري )
الأنتاميبا المحبوسة: ياااااامة عصافير بطني بتصوصو كلمي اخوكي.. عايزة عصير جوافة وساندوكتش همبرجر.. ومافيش مانع لو في كاتشب وهوت صوص..
الأنتاميبا الأم: يابت اسكتي خلي ليتك تعدي على خير
الزحرور: من عنيا يابنت اختي ده انا حأكلك بـأديا
الأنتاميبا المحبوسة: الا ايه طقم الحنيه اللي نازل على اخوكي ده ياماما..
الأنتاميبا الأم: حنية السل الرئوي على البني ادمين ..
الزحرور: ادينا وصلنا .. انزلي من تحت عقب الباب وافتحيلنا
الأنتاميبا الأم: حاضر يا اخويا.. بس قلي ناوي على ايه .. ليطمئن قلبي
الزحرور: جاك خابط في قلبك .. افتحييييييييي
الأنتاميبا الأم : سنانها بتخبط في بعض وصوابعها بتترعش...
طيب طيب.. بس ما تزعلش نفسك
تخش الأنتاميبا الأم من تحت عقب الباب وتفتح....
المكان :شقة بني ادمين( مطبخ واسع.. ثلاجة.. سلة خضار .. سلة فاكهه... عيل صغير.. اب وام..)
الأكل يتحط على السفرة.. سلطة خضرا بترابها.. شوية جرير.. على سلطة بقدونس .. مش مغسوله كويس.. وشوية فول وطحينة .... تفاحه مطينة بطين
العيل طالع من الحمام وايديه وسخه يمسك خساية ويقزقز فيها .. الأم تقطع اللحمة بسكينه معفنه وشوية تلعب في مناخيرها .. تطلع تفاحه من جيب مريلة المطبخ تقرقش فيها.. الأب جاي من الشغل داخل على المطبخ عـ الأكل من غير ما يغسل ايديه ...
الأنتاميبا المحبوسه بتبصلهم بقرف من خرم صغير في الشوال
الأنتاميبا المحبوسة: ياي دي عيله مقرفة.. افففف..
الزحرور: سكتي بنتك لحسن بضهر ايدي على وشها عدل...
الأنتاميبا الأم: تكتم نفس الأنتاميبا البنت ......
الزحرور: العيلة الجربنانة دي ياشاطرة هيا اللي حترجعك لبيتك اللي هربتي منه....
الأنتاميبا البنت تعض أيد الأم: ومين قالك اني عايزة ارجع يازحرور الهم ...
الزحرور: وبتقلي ادبك كمان... ان ما وريتك اما نخش بس
الأنتاميبا الأم: قلبك ابيض يااخويا.. هيا حرمت خلاص مش كده يابت؟؟
الأنتاميبا البنت: لأ مش كده .. وبعدين حيعمل ايه يعني حيموتني.. احسن ما ارجع للبيئه العرة بتاعتكم
الزحرور: تبقى في ايدي ومحبوسة في شوالي وتقلي ادبك عليا ...
وينزل فيها ضرب .. اقلام على بوكسات .. .. الأم تحاول تحوشة عنها فينوبها من الحب جانب...
الأنتاميبا البنت:برضه ولا يهمني.. قال عايزني ارجع عشان يجوزني ابنه المعفن.. وياخد ورثي من دادي... مش داخله
الزحرور: حتخشي يعني حتخشي...
ويروح مطلعها من الشوال ولازقها في ورقة جرجير ماسكها الولد الصغير
تروح الآنتاميبا موشوشة الواد:
يلا ورايا
هات صابونايه
وادعكها في ايدك
ميه نظيفه
حلوة ظريفة
تلاقيها في بيتك
الواد يطنش وياكل الجرجير من غير ما يغسل ايده!!
الأنتاميبا تنط من ورقة الجرجير .. يمسكها الزحرور.. يلزقها في التفاحه..
تمسك ودان الأم:
عاملة وليمة فول وطحينة
مش غاسلة ايدك
كم خساية وبقدونساية
وتفاحة في جيبك
كل بطينه مش غاسلينه
ولا فارقة معاكي
الأم (ست البيت)
ترد بعصبية وجليطه..
سيبوني في حالي
عـ الـ في بالي وحربي عيالي
تجيلي اميبا..يوة بلا خيبة
ولا تيجي في بالي
الأب مقموص من الحشرية بتاعة الأنتاميبا وامها:
سيبونا في حالنا
ولا على بالنا
وحتربي عيالنا
تجيلنا اميبا
تبقى مصيبة
لينا ولعيالنا
الأنتاميبا الأم والبنت مزبهلين من القذارة الرهيبة في العيلة دي!!!!
حاجة عجيبة
عيلة غريبة
لابيغسلوا ايدهم
ولا فاكهتهم ولا خضرتهم
حتى في يوم عيدهم.....
الزحرور: وانت مالك يا حشرية انت وهيا .. ويمسك الانتاميبا الام فـ ايد والبنت ف ايد ويلزقوا هما الثلاثه في سلطة البقدونس ..
الانتاميبا البنت تحاول تهرب .. لكن مافيش فايده..
الزحرور مسكها جااااااامد.. الاب ياخد بقدونس على شوية جرجير.. تدخل الانتاميبا الام في بطنه
العيل ياخد سلطه خضرا.. ينط الزحرور ومعاه الانتاميبا البنت .. فـ السلطه ... وهمممممممممم.. يدخلوا الاثنين في بطن الواد....
الأميبات والأنتاميبات : يكونوا مجهزين حفل استقبال كبيييييييير للأنتاميبا الصغنونة الهربانة...
معلقين الزينه .. ومالين الدنيا زغاريد.....
الأنتاميبا مكشرة وقرفانه منهم
الزحرور يشدها من شعرها: خشي يا بت سلمي على حماتك..
الأنتاميبا الصغنونة: حماتي؟؟ الأميبا العجوزة دي حماتي انا.... نو نو نو موش من مستوياااااااا ....
الزحرور: البت دي باين عليها مش حتجيبها البر
الأنتاميبا الحماة: سيبهالي يا زرزورتي .. وما تحملش هم
الأنتاميبا الحماة تاخد الأنتاميبا الصغنونة.. وتشيكها وتأنتكها وتلبسها فستان الفرح .. وياعيني الأنتاميبا الصغنونة حتموت نفسها من العياط والمكياج يبوظ..
الأنتاميبا الحماة: ما تهمدي يا بت .. خليني اعرف اجهزك لعريسك.. لحسن اخلي خالك يحبسك انفرادي.. وانت عارفه الباقي...
الأنتاميبا الصغنونة: لا يا حماتي بلاش انفرادي الهي ما يحبسلك جته..
بس انا عايزة اقول حاجة..
الأنتاميبا الصغنونة: هيا العروسة ليلة زفتها مش بتبقى محتاجه ماماتها تبقى معاها.. انا عايزة مامااااااااااااااااميييييييي..
الأنتاميبا الحماه: وانا اجيبلك مامي منين دلوقتي؟؟ يا زحرورو.. البت عايزة امها...
الزحرور: تفكير عميق :اممممممممم .. امك في بطن الراجل .. يعني اشق بطنه واجيبهالك..
الأنتاميبا الصغنونة: ماليش دعوه مش حتجوز ابنك .. عايزة مامي .. عايزة مامي وتخبط برجليها...
الزحرور : بسسسسسسسس... هششششششش انا حتصرف .. اخرسي
ويروح الزحرور لبق الواد ...... وينط منه لبق الراجل ويخش بطنه.. ومن الأمعاء الدقيقة .. يلاقي الأم قاعدة ورابطه دماغها وبتولول على بنتها
الأنتاميبا الأم: ضاعت مني تااااااني يااخواااااااتي..
اه يااااااااني يا بنتي .. اشوف فيك يوم يازحرور...
منك لله يا بعيد.. هاتولي بنتيييييييييييييي
الزحرور: يطبطب عليها .. بنتك معايا يا ختي.. تعالي معايا وانت تشوفيها .. وتحضري زفتها كمان...
الأنتاميبا الأم: بجد يا اخويا .. حشوف بنتي .. ايوة ياوليه .. يلا بسرعه ما فيش وقت قبل ما الراجل ما يقفل بقه...
وياخد الأم ويطلع من بق الراجل ويخش فـ بطن الواد.....
الزحرور: انا جبتلها امها.. خلصونا عايزين الفرح يعدي على خير....
الأنتاميبا الحماه رجليها مكسوره وعنيها حمرا.. وهدومها متقطعه..
الأنتاميبا الأم: ايه اللي عامل فيكي كده يا حمات بنتي؟؟
الأنتاميبا الحماه: حماة بنتك.. حمى الدبب.. انا اجوز الفك المفترس ده لأبني.. ده بعدكوووووووو....
الأنتاميبا الأم: قال يعني روميوا .. بلا خيبة.. اشحال لو ما كنتوش طمعانين في ورث البت
الأنتاميبا الحماه: ورث ايه يا ا م ورث ..اللي في علب التحاليل.. ولا اللي بيتشد عليه السيفون...
ويمسكوا في شعر بعض .. وبالأطباق والحلل .. الزحرور مش عارف يحوشهم عن بعض....
العروسة عايزة تهرب ..... يجي العريس اخر وسامه وضارب بدله سالفها من عند المكوجي .. يلحق العروسة.. ومن كثر الشياكة الأنتاميبا
ما تعرفش هو مين .؟؟
العريس: انت مش عارفاني ياست الأميبات انا عريسك ....
الأنتاميبا الصغنونة:.انت ابن خالي؟؟؟ من امتى الشياكه دي يا واد؟؟
العريس: من يوم ما شفتك ياقمري... تجوزيني؟؟؟
الأنتاميبا الصغنونة مكسوفة ووشها احمر : حتعيشني في الساحل الشمالي
العريس: من عنيا يا نور عنيا
الأنتاميبا الصغنونة اطلب ايدي من مامي...
العريس يروح لعمته ماسك عروسته في ايده..و ف وسط الخناقه..
العريس: عمتي انا طالب القرب منك.. في ميمي
الأنتاميبا الأم : عمتي؟؟! تطلع مين حضرتك؟؟
الأنتاميبا البنت:.. ده ابن اخوكي.. بعد التعديل يامامي
الأنتاميبا الأم: انعم واكرم.. طيب سيبوني افكر
الأنتاميبا العروسة والعريس: وافقي يا عمتي.. عشان خاطري ياماماااااااا
ويتحايلوا عليها لحد ما توافق..
الأنتاميبا الأم : شفتي العيال يا ختي .. طلعوا عنينا . وهما اللي بيتحايلوا علينا دلوقتي...
الأنتاميبا الحماه:ابتسامه صفراء.. ايوه يا اختي شايفة .. جيل الدوش والعنكبوتر...
ينفض الفرح كله يروح بيته .. والعروسة للعريس...
العروسة: انت حتوديني الساحل الشمالي امتى؟؟
البدله الجربانة تطلع من الدولاب .. المكوجي يخبط على الباب ياخد بدلة الفرح ... الريحه المعفنة ماليه البيت
العروسة : ايه الريحه دي .يععععععععع ؟؟ هو انت سالف البدله كمان؟؟
العريس: اذا كان عاجبك .. قال عايزة تروح الساحل الشمالي؟؟ هو انا قادر على مصاريف الساحل الجواني !!! امشي انجري اعمليلي العشا انا جعان.. وامي وحماتي وابويا جايين
العروسه : بنظرة لئيمه تحب تاكل ايه يا سبعي .. ( ان ما جبتلكو تلبك معوي)
العريس: عايز لحمة راس.. صنية بطاطس.. و محشي ورق عنب.. ور زبالخلطة ..والحلو بسبوبسة بالقشطة والمسكرات.. وطبق كنافه ... ولا ما بتعرفيش تطبخي؟؟
العروسة: لا يا اخويا بعرف ... ثواني والأكل يجهز
العروسة تخش المطبخ تلبس المريلة .. تحضر الأكل حاجة خلطبيطه لاليها طعم ولا لون...
بالهنا والشفا ياسيد الأنتاميبات.... بالهنا والشفا ليكم جميعا...
العريس يجيله تسمم.. هو والمعزومين توصل عربية الأسعاف...تاخدهم
العروسة تقف قدام باب بيت الزوجيه... يا معشر العرسااااااااااااان...
هل من مبارز؟؟؟؟ حد عايز يطلبني من امي ؟؟؟؟؟
كل العرسان تهرب مذغورة .. مرعوبة..
الأنتاميبا الصغنونة: اللي عايزة تصيف في الساحل الشمالي تيجي ورايا؟؟
الأنتاميبات الجميلات يجروا ورا الأنتاميبا الصغنونة.. وكله يقطع تذاكر .. ويقضوا اجازة العيد في الساحل الشمالي ...
تمت |
